एट्लेटिकोलाई हराउँदै रियल फाइनलमा

काठमाडौँ- रियल मड्रिड स्पेनिस सुपर कपको फाइनलमा पुगेको छ ।

गएराति भएको खेलमा एट्लेटिको मड्रिडलाई ५-३ गोल अन्तरले पराजित गर्दै रियल मड्रिड सुपर कपको फाइनलमा पुगेको हो ।

निर्धारित ९० मिनेटको खेलमा दुवै क्लबले ३-३ गोल गरेपछि खेल ३० मिनेटको अतिरिक्त समयमा गएको थियो । अतिरिक्त समयमा रियल मड्रिडले २ गोल थपेपछि खेल ५-३ ले जितेको थियो ।

रियल मड्रिडका लागि एन्टोनियो रुडीगेर, फेर्लान्ड मेन्डी, डानी कार्भाजल, जोसेलु र ब्राहिम डियाजले एक-एक गोल गरेका थिए ।

त्यसैगरी एट्लेटिको मड्रिडका लागि मारियो हेर्मोसो र एन्टोनियो ग्रीजम्यानले एक-एक गोल गरेका थिए भने एक गोल रियलका एन्टोनियो रुडीगेरले आत्मघाती गोल गरेका थिए ।

अब फाइनलमा रियल मड्रिडले बार्सिलोना र ओसासुनाबीचको विजेतासँग जनवरी १४ मा खेल्ने छ । बार्सिलोना र ओसासुनाबीचको सेमिफाइनल खेल आज राति हुँदैछ ।

स्पेनिस सुपर कोपा ला लिगाको विजेता र उपविजेता तथा कोपा डेल रेको विजेता र उपविजेता खेल्ने गर्दछन् । यस सिजनमा रियल मड्रिड कोपा विजेता र ला लिगाको उपविजेता भएकाले ला लिगाको तेस्रो स्थानमा रहेको एट्लेटिको मड्रिडले खेल्ने अवसर पाएको छ ।