'एनिमल' पछि बलिवुडमा चम्किएकी तृप्ति

काठमाडौँ- सन् २०२३ को अन्तिम महिना रिलिज भएको फिल्म 'एनिमल' बक्स अफिसमा ब्लकबस्टर साबित भयो । सो फिल्ममा तृप्ति डिमरीले केही मिनेटको भूमिका खेलेर सनसनी मच्चाएकी थिइन् ।

फिल्ममा उनको अभिनयलाई दर्शकले निकै रुचाएका थिए र उनलाई ‘भाभी २’ को उपनाम समेत दिएका थिए । एनिमलको सफलताबाट तृप्तिको करिअरलाई सबैभन्दा बढी फाइदा भएको छ । अहिले उनले एक पछि अर्को ठूलँ बजेटको फिल्ममा काम गरिरहेकी छन् ।

उनको हालै धर्मा प्रोडक्सनको फिल्म 'धड्क-२' को घोषणा गरिएको छ । फिल्मको छोटो प्रोमो सार्वजनिक गर्दै निर्माताले तृप्ति डिमरी र सिद्धान्त चतुर्वेदी मुख्य भूमिकामा देखिने जानकारी दिइएको छ । फिल्मलाई शाजिया इकबालले निर्देशन गरिरहेकी छन् । यो फिल्म नोभेम्बर २२ मा हलमा रिलिज हुने बताइएको छ ।

त्यस्तै उनको अर्को फिल्म ब्याड न्यूज पनि आउने भएको छ । गुड न्यूजपछि धर्मा प्रोडक्सनले चाँडै ब्याड न्यूज ल्याउने भएको छ । फिल्मको स्टार कास्टको कुरा गर्दा विक्की कौशल र एमी विर्क मुख्य भूमिकामा छन् । फिल्ममा तृप्तिले मुख्य नायिकाको रूपमा काम गरेकी छन् । यो फिल्म जुलाई १९ मा बक्स अफिसमा रिलिज हुनेछ ।

त्यस्तै 'भुलभुलैया ३' मा पनि तृप्तिले काम गरेकी छन् । अनीस बज्मीको निर्देशनमा बन्न लागेको चलचित्र ‘भुल भुलैया ३’ को लागि मानिसहरू लामो समयदेखि पर्खिरहेका थिए । फिल्ममा कार्तिक आर्यनले फेरि एकपटक रुह बाबाको भूमिका निभाएर मानिसहरूलाई हँसाउन लागेका छन् । यो फिल्ममा तृप्ति डिमरी पनि देखिने छन् । केही समय अघि उनी फिल्मको पोस्टरमा देखिएकी थिइन् ।

त्यस्तै 'एनिमल' को सिक्वेल भनिएको फिल्म 'एनिमल पार्क' मा पनि तृप्ति आउँदै छिन् । सन्दीप रेड्डी वाङ्गाको निर्देशनमा बन्न लागेको यो फिल्मलाई लिएर दर्शकमा निकै उत्साह छ । मिडिया रिपोर्टका अनुसार फिल्ममा तृप्ति पनि महत्वपूर्ण भूमिकामा देखिने छिन् । अहिले यो चलचित्र प्रि-प्रोडक्सन चरणमा छ । एजेन्सी