जेलेन्स्कीले ट्रम्पलाई गरेको फोन मस्कले उठाएपछि...

काठमाडौँ- डोनाल्ड ट्रम्पले अमेरिकी राष्ट्रपतिको सपथ लिन अझै दुई महिना बाँकी छ । तर, यसअघि नै देश विदेशका समस्या समाधान गर्ने तयारीमा जुटेका छन् । यस सम्बन्धमा उनको पहिलो प्राथमिकता रुस र युक्रेनबीचको युद्ध अन्त्य गर्ने हो । ट्रम्पले द्वन्द्व अन्त्य गर्ने विषयमा छलफल गर्ने कुनै पनि विदेश नीति विशेषज्ञलाई जिम्मेवारी नदिएको कुरा अहिले बाहिर आएको छ । बरु ट्रम्पले यसका लागि आफ्ना निकटतम समर्थक एलन मस्कलाई अगाडि सारेका छन् ।

यसअघि ट्रम्पले राष्ट्रपति बनेपछि युद्ध सुरु नगर्ने तर अन्त्य गर्ने बताएका थिए । यति मात्र होइन, उनले मस्कलाई आफ्नो प्रशासनमा ठूलो जिम्मेवारी दिने पनि बताए । अब केही अमेरिकी सञ्चारमाध्यमहरूले पनि स्रोतलाई उद्धृत गर्दै यसबारे दाबी गरेका छन् ।

ट्रम्पले भर्खरै युक्रेनी राष्ट्रपति भोलोडिमिर जेलेन्स्कीसँग फोनमा कुराकानी गरेको बताइएको छ । अचम्मको कुरा के छ भने यो कुराकानीमा ट्रम्प र जेलेन्स्की मात्र नभई मस्क पनि संलग्न थिए । विभिन्न मिडियाले जेलेन्स्कीले ट्रम्पलाई गरेको फोन मस्कले उठाएको भन्दै ट्रोल पनि गरिरहेका छन्  ।    

अमेरिकी मिडियाका अनुसार युक्रेनको मुद्दामा दुईवटा ठूला घटना भएका छन् । पहिलो, मस्कले भोलोडिमिर जेलेन्स्कीसँग कुरा गरेको र दोस्रो यो वार्तापछि जेलेन्स्कीले द्वन्द्वका विषयमा केही कुरा बुझाएर सहमति जनाएका छन् । यसले ट्रम्पको दोस्रो कार्यकालमा मस्कको महत्त्वलाई उजागर गर्छ ।

रिपोर्टमा ट्रम्प, मस्क र जेलेन्स्कीबीच करिब आधा घण्टा फोन वार्ता भएको बताइएको छ । जेलेन्स्कीबाट बधाई पाएपछि ट्रम्पले युक्रेनलाई समर्थन गरिरहने बताए । तर, उनले यसबारे धेरै खुलासा गरेनन् ।

युक्रेनका राष्ट्रपतिसँगको कुराकानीमा मस्कले स्टारलिंक स्याटेलाइटमार्फत युक्रेनलाई सहयोग गरिरहने आश्वासन दिएका छन् । २०२२ मा रूसी आक्रमण पछि, मस्कको स्टारलिंक प्रणालीले युक्रेनलाई रूस विरुद्धको युद्धमा धेरै मद्दत गरिरहेको छ । विशेष गरी युक्रेनी सेनाले रुसको गुप्तचर र गतिविधिहरू जम्मा गर्न धेरै मद्दत गरिरहेको छ । यसबाहेक ड्रोनको सम्पर्क, डाटा र भिडियो फुटेज सङ्कलनमा पनि युक्रेन अगाडि रहेको छ । स्टारलिंक प्रणालीका कारण युक्रेनको मोबाइल नेटवर्क ध्वस्त भए पनि सञ्चारको हिसाबले अहिलेसम्म बलियो देखिएको छ ।