नेपाल र चीनबीच कृषि तथा पर्यटन क्षेत्रमा भएको सहमतिले मुलुकमा समृद्धि ल्याउन मद्दत गर्छ - कृषिमन्त्री अधिकारी

फाइल फाेटाे

काठमाडौँ - कृषि तथा पशुपक्षी विकासमन्त्री रामनाथ अधिकारीले नेपाल र चीनबीच कृषि तथा पर्यटन क्षेत्रमा भएको सहमतिले मुलुकको समृद्धिमा महत्वपूर्ण योगदान पुग्ने बताएका छन् । 

नेपालको कृषि तथा पर्यटन विकासमा चीनको विआरआइ फ्रेमवर्कले पुराउने सहयोगका विषयमा मंगलबार काठमाडौंमा आयोजित कार्यक्रममा मन्त्री अधिकारीले नेपाल र चीनबीच भएका सहमतिले मुलुकको समृद्धिमा महत्वपूर्ण योगदान पुग्ने भएकाले यसको कार्यान्वयनमा विशेष जोड दिने पनि बताए । 

उनले प्रधानमन्त्रीको चीन भ्रमणको समयमा नेपाल र चीनबीच राँगाभैंसीको मासु निर्यात गर्ने विषयमा भएको सम्झौताले नेपाल–चीनबीच पशुजन्य उत्पादनको व्यापार सहजीकरणमा महत्वपूर्ण हुने धारणा राखे । 

पशुपञ्छीमा देखिने खोरेत रोगमुक्त क्षेत्र घोषणाका लागि इलामबाट काम सुरु भइसकेको र अन्य जिल्लामा विस्तार गरिने उनले बताए । उनले बनस्पति निर्यातका लागि चीनको भन्सारसंग समन्ँवय गरिएको जानकारी दिए । 

त्यस्तै नेपालका लागि चिनियाँ राजदूत छेन सोङले नयाँ प्रविधिको प्रयोग गर्दै विआरआइ फ्रेमवर्कका परियोजनाहरुलाई अघि बढाउने बताए ।  मुलुकको पर्यटन क्षेत्रका बिकास पनि चीनले विभिन्न कार्यक्रमहरू अघि सारेको भन्दै उनले यसले दुई देशबीचको पर्यटन सम्बन्ध समेत विस्तार हुने बताए । 

कार्यक्रममा नेपाल–चाइना फ्रेन्डसिप फोरमका अध्यक्ष डा कल्याणराज शर्मा लगाएतले बिआरआईसँग सम्बन्धित लगानीले नेपाललाई पुराउने फाइदाका बारेमा चर्चा गरेका थिए ।