वर्तमान सरकार पूर्णरुपमा असफल - उपाध्यक्ष सापकोटा

फाइल फाेटाे

काठमाडौं - नेकपा माओवादी केन्द्रका उपाध्यक्ष अग्निप्रसाद सापकोटाले वर्तमान सरकार पूर्णरुपमा असफल भइसकेको बताएका छन् । 

बिहीबार काठमाडौंमा प्रेस सेन्टर नेपाल प्रतिष्ठान प्रदेश समितिको चौथो अधिवेशन उद्घाटन गर्दै उपाध्यक्ष सापकोटाले देशका समस्या समाधान गर्न र जनजिविकाका विषयमा सरकार पूर्णरुपमा असफल भइसकेको बताएका हुन्।

उनले दुई तिहाइको सरकारले सदनबाट डराएर बदनियतपूर्ण डंगले अध्यादेश ल्याएको आरोप लगाए । आफ्ना कार्यकर्तालाई जग्गा बाड्नकै लागि सरकारले भूमिसम्बन्धी अध्यादेश ल्याएको उनले बताए । 

सापकोटाले संसद ढिलो बोलाउने र विधेयकहरुलाई फास्ट ट्रयाकमा लैजाने कुराले सरकारले अत्तालिएको देखिएको जिकिर गरे । विपक्षीहरूले तर्कसहित अध्यादेशको विरोध जनाउने निर्णय गरेपछि सत्तारुढ दलले त्यसको प्रतिवाद गर्न आफ्ना सांसदहरूलाई निर्देशन दिएको उनले बताए । 

सापकोटाले पार्टीलाई एकताबद्ध बनाएर राष्ट्रिय दृष्टिकोणका साथ अघि बढे कसैले माओवादीलाई सिध्याउन नसक्ने धारणा राखे ।