अस्थायी युक्रेन युद्धविराम अस्वीकार्य : रुस

मस्को- युक्रेनका राष्ट्रपति भोलोदिमर जेलेन्स्की र फ्रान्सेली राष्ट्रपति इमानुएल म्याक्रोनको युक्रेनमा एक महिनाका लागि युद्धविराम वा हवाई र नौसैनिक आक्रमणहरू रोक्ने प्रस्तावलाई अस्वीकार गर्दै रुसले बिहीबार युक्रेनमा अस्थायी युद्धविराम स्वीकार नगर्ने बताएको छ ।

अमेरिकी राष्ट्रपति डोनाल्ड ट्रम्पले द्वन्द्वको शीघ्र अन्त्यका लागि दबाब दिइरहेका छन् तथा युक्रेनलाई हतियार र खुफिया आपूर्ति रोकिदिनुभएको छ । यसबाट रुसी आक्रमणलाई रोक्न युक्रेनको क्षमतालाई कमजोर बनाएपछि सम्भावित युद्धविरामको चर्चा तीव्र छ ।

युक्रेनी राष्ट्रपति जेलेन्स्कीले सम्भावित शान्ति सम्झौताको पहिलो चरणका रूपमा आकाश र समुद्रमा आक्रमणहरू तुरुन्त रोक्न आह्वान गरेका छन् ।

साथै म्याक्रोनले फ्रान्सको ले फिगारो पत्रिकालाई आइतबार पेरिस र लन्डनले ‘हावा, समुद्र र ऊर्जा पूर्वाधारमा’ आक्रमणहरू समेट्ने एक महिनाको युद्धविराम प्रस्ताव गरिरहेको बताएका छन् ।

तर मस्कोले बिहीबार कुनै पनि अस्थायी वा आंशिक युद्धविराम अस्वीकार गरेको देखिन्छ ।

“अन्तिम समझौताका लागि दृढ सम्झौताहरू आवश्यक छन् । त्यो सबै बिना, कुनै प्रकारको विश्राम पूर्णतया अस्वीकार्य छ”, विदेश मन्त्रालयकी प्रवक्ता मारिया जाखारोभाले टेलिभिजनमा प्रसारित ब्रिफिङमा पत्रकारहरूलाई भने, “हामी कुनै पनि मूल्यमा मृतप्राय किएभ शासनलाई राहत दिन र मोर्चाको पतन रोक्नका लागि स्पष्ट इच्छाका साथ व्यवहार गरिरहेका छौँ, युक्रेनले आफ्ना सहयोगीहरूको मद्दतले आफ्नो सैन्य क्षमता बलियो बनाउन यो विराम प्रयोग गर्नेछ ।”

सन् २०२२ फेब्रुअरीमा मस्कोद्वारा सुरु गरिएको द्वन्द्वको समाधानका लागि सम्भावित वार्ताअघि रूसी अधिकारीहरू आफ्ना कडा मागहरूमा अडिग छन् ।

उनीहरूले पछिल्लो तीन वर्षमा कब्जा गरिएको युक्रेनी क्षेत्र छोड्न अस्वीकार गरेका छन्, युरोपेली शान्ति सेना अस्वीकार्य रहेको बताएका छन् र युरोपभरि नाटोको उपस्थिति कम गर्ने इच्छा दोहोर्‍याएका छन् ।

ट्रम्पको युक्रेनलाई दिएको सैन्य सहायता निलम्बन गर्ने कदमले किएभ र युरोपभरि युक्रेनलाई मस्कोका लागि अनुकूल सर्तहरूमा शान्ति स्वीकार गर्न बाध्य पार्न सक्ने डरलाई कडा बनाएको छ । (एएफपी)