ईश्वर पोखरेल हटेपछि सेनाको बैठक

काठमाडौं :  रक्षा मन्त्रीबाट ईश्वर पोखरेल बाहिरिएपछि नेपाली सेनाको पृतनापति समन्वयात्मक भर्चुअल बैठक आइतबार गर्ने भएको छ । उपप्रधानमन्त्री पोखरेललाई रक्षाबाट विमुख गराई प्रधानमन्त्री कार्यालयको जिम्मेवारी दिएपछि पहिलोपटक भर्चुअल बैठक हुन लागेको हो ।

भर्चुअल माध्यमबाट हुने उक्त बैठकमा प्रधानसेनापति पूर्णचन्द्र थापा र रथिबृन्द्धहरु सहभागी हुनेछन । मुलुकको बढ्दो रक्षा चुनौती र सेनासम्बद्ध सममायिक विषयमा छलफल गर्न यो बैठक गर्न लागिएको हो ।

रक्षा मन्त्रालयको प्रत्यक्ष जिम्मेवारी लिएका प्रधानमन्त्री ओलीले भर्चुअल बैठकको उद्घाटन गर्ने कार्यक्रम छ । निवर्तमान रक्षा मन्त्री पोखरेलसँगको सम्बन्धमा चिसो आएका कारण सेनाले उक्त महत्त्वपूर्ण बैठक कोभिड–१९ को बहाना देखाएर सार्दैआएको आरोप पोखरेल निकट अधिकारीहरुको छ । 

भारतीय स्थल सेना प्रमुख मनोज मुकुन्द नाराभानेको नेपाल भ्रमण पूर्वसन्ध्यामा हुन लागेको यो बैठकलाई अर्थपूर्ण मानिएको छ ।  सेनाका प्रवक्ता सहायक रथी सन्तोषबल्लभ पौड्उयालका अनुसार समन्वयात्मक तीनदिने बैठक पहिलो पटक भर्चुअल माध्यमबाट हुन लागे पनि यहाँबाट भने भौतिक दुरी कायम गर्दै सहभागिता रहनेछ ।

सातवटै प्रदेश र उपत्यका गरी सेनाका ८ पृतना छन् । पृतनापति भेलामा सम्बन्धित प्रमुख तथा उपरथीहरूले आफ्ना पृतनाको काम, कारबाही र त्यस क्षेत्रको सुरक्षाको विषयमा जानकारी दिनेछन् । यस अलवा सुरक्षा चुनौति, सीमाको विषय लगायतमा पनि छलफल हुनेछ ।