वायुसेवा निगमलाई हङकङ उडानमा फेरि प्रतिबन्ध, पाँचजना यात्रुमा देखियो कोभिड-१९

काठमाडौं : हङकङले नेपाली ध्वजाबाहक नेपाल वायु सेवा निगमको जहाज उडानलाई दुई साताको लागि प्रतिबन्ध लगाएको छ । निगमको जहाजबाट हङकङ अवतरण भएका ५ यात्रुमा कोरोना परीक्षण पोजेटिभ देखिएपछि प्रतिबन्ध लगाएको हो । 

हङकङले चौथोपटक निगमलाई प्रतिबन्ध लगाएको निगमका सहप्रवक्ता सुलेख मिश्रले पुष्टि गरे । उनले इकागजसँग कुरा गर्दै भने, 'पाँचजना पोजेटिभ देखिएका यात्रुमा १ जना सस्पेक्टेड भएको खबर प्राप्त भएको छ ।'

निजी ल्याबको परीक्षणलाई मान्यता नदिने भएकाले निगमले सरकारी प्रयोगशालामार्फत कोभिड-१९ परीक्षण गरेको थियो । परीक्षणमा रिपोर्ट नेगेटिभ आएपछि निगमको उडानमा उनीहरुलाई सहभागी गराइएको उनले जानकारी दिए । तर, हङकङमा गरिएको परीक्षणमा उनीहरुको रिपोर्ट पोजेटिभ आएको हो । 

गत सोमबार निगमले उडान गरेको थियो । यसअघि  हङकङ जाने यात्रुले ह्याम्स र स्टार लगायत निजी अस्पतालको प्रयोशालामा कोभिड-१९ को परीक्षण गराउँदै आएका थिए । निजी प्रयोगशालाको रिपोर्टमाथि प्रश्न उठेपछि निगमले यात्रुलाई सरकारीमा परीक्षण गराएको रिपोर्ट ल्याएमात्रै उडानमा सहभागी गराउने भएको थियो ।
सुरुको उडानमा चार जनामा संक्रमण पुष्टि भएपछि हङकङले निगमलाई अक्टोबर ४ देखि १७ सम्म उडानमा प्रतिबन्ध लगाएको थियो। उडानमा संक्रमित संख्या बढेरनौ जना पुगेपछि हङकङ एयरपोर्टले अक्टोबर २२ नोभेम्बर ४ सम्म फेरि प्रतिबन्ध लगाएको थियो ।

त्यसपछि पनि एक साताकै अन्तरालमा भएको काठमाडौं-हङकङ उडानमा १४ जना संक्रमित पुष्टि भएका थियो । जसका कारण हङकङले  नोभेम्बर १२ देखि २५ तारिखसम्म उडानमा प्रतिबन्ध लगाएको थियो । अन्तर्राष्ट्रिय उडान खुला भएसँगै निगमले काठमाडौं-हङकङतर्फ साताको एउटा उडान गर्दै आएको जनाएको छ ।