प्रियंकाको फिल्ममा निकको ‘केमियो’

प्रियंका चोपडा यतिबेला लन्डनमा ‘टेक्स्ट फर यु’ फिल्मको सुटिङ गरिरहेकी छिन् । साम ह्युघान, सेलिने डन आदि कलाकार रहने फिल्मको सुटिङ लन्डनमा धमाधम भइरहेको छ । तर, यो फिल्ममा निक जोनासको पनि विशेष भूमिका रहेको खुलासा भएको छ । बेलायती पत्रिका डेलीमेलले फिल्ममा निक जोनासको पनि केमियो रहने खबर छापेको छ ।

डेलीमेलले सुटिङको फोटो छाप्दै प्रियंका र निकले गाडीमा झगडा गर्ने दृश्यको सुटिङ गरेको जनाएको छ । दुई वर्षअघि विवाह गरेका निक र प्रियंकाले फिल्ममा सहकार्य गर्न लागेको यो पहिलो अवसर हो । ‘क्वान्टिका’बाट हलिउडमा डेब्यु गरेकी प्रियंकाले साना ठूला गरी आधा दर्जन फिल्ममा काम गरे पनि उल्लेख्य सफलता हात पारेकी छैनन् । ड्वेयन जोन्सनसँगको ‘बेवाच’ पनि बक्स अफिसमा असफल भएको थियो । ‘टेक्स्ट फर यु’ जर्मन फिल्मको रिमेक हो । 

बलिउडमा भने उनले पछिल्लो समय ‘स्काइ इज पिंक’मा काम गरेकी थिइन् । सत्यकथामा आधारित फिल्ममा उनले दीर्घरोगले ग्रसित बच्चीको आमाको भूमिका निर्वाह गरेकी थिइन् । फिल्ममा फरहान अख्तरले उनको श्रीमान्को भूमिका निर्वाह गरेका थिए ।