उखु किसानलाई विवेकशील साझाको साथ

काठमाडौं : भुक्तानी नपाएर आन्दोलन गर्न काठमाडौं आएका उखु किसानको मागलाई विवेकशील साझा पार्टीले ऐक्यबद्धता जनाएको छ । आइतबार एक विज्ञप्ति जारी गर्दै उक्त पार्टीले ऐक्यबद्धता जनाएको हो ।

'उखु किसानहरूले आफ्नो उत्पादन बिक्री गरेको वर्षौँदेखिको बक्यौता रकम उठाउन गरिरहेका सङ्घर्षमा विवेकशील साझा पार्टी पूर्ण ऐक्यबद्धता व्यक्त गर्दछु जारी विज्ञप्तिमा भनिएको छ 'आफ्नो पसिना र परिश्रमको प्रतिफल पाउन समेत सयौँ किलोमिटर टाढा सङ्घीय राजधानी आएर प्रदर्शन गर्नुपर्ने दुखदायी परिस्थितिका लागि मूलतः सरकार जिम्मेवार छ ।'                         

गत वर्ष पुष १८ गते उद्योग वाणिज्य तथा आपूर्ति मन्त्रालयले एक महिनाभित्रै चिनी उद्योगीहरूबाट किसानहरूलाई भुक्तानी दिलाइदिने  सहमति गरे पनि उक्त सहमतिको झण्डै एक वर्ष भइसक्दा पनि त्यसको पूर्ण कार्यान्वयन नगर्नु र उखु किसान पुनः आन्दोलनका लागि काठमाडौँ आएको थाह पाएर सरकारले चिनी उद्योगी खोज्‍न थाल्नु खेदजनक रहेको विज्ञप्तिमा उल्‍लेख छ ।

सरकार आम किसानलाई न्याय दिलाउने पक्षमा छ भन्‍नेमा प्रशस्त आशंका उब्जिएको साझाले जनाएको छ । 'सरकार किसानको पक्षमा छ भने, हामी नेपाल सरकारलाई उखु किसानहरूले आइन्दा एक दिन पनि सङ्घर्ष गर्नु नपर्ने गरी समस्या समाधानका लागि तुरुन्त जिम्मेवार बन्‍न अनुरोध गर्दछौँ' साझाले भनेको छ।

साझाले काठमाडौँको यो जाडोमा आजदेखि हुने आन्दोलनमा सहभागी उखु कृषक मित्रहरूलाई आवश्यक सहयोग गर्न सबै नागरिकहरू र पार्टी पङ्क्तिमा पनि अनुरोध गरेको छ । कृषकहरूको उत्थानका लागि कृषि उपजहरूको उपयुक्त न्यूनतम समर्थन मूल्य तोकी खरिद र तत्काल भुक्तानीसमेतको ग्यारेन्टी सरकारी तहबाट गरिनु पर्ने साझाको माग छ । सरकारसँग उखु किसानहरूको समस्या तत्काल समाधान गरी किसानहरूको पक्षमा तत्काल लागू हुने निर्णय गर्न अनुरोध गरेको छ ।

र, यो पनि
- उखु किसानले सुरु गरे आन्दोलन, कसलाई कति बक्यौता बाँकी ?