कूटनीतिको ‘क’ पनि नजान्नेहरू राजदूत भए : भीम रावल

काठमाडौँ – नेकपा एमालेका उपाध्यक्ष भीम रावलले नेपालले कूटनीतिक क्षेत्रलाई सुदृढ बनाउनुपर्नेमा जोड दिएका छन् । उपाध्यक्ष रावलले देशको पहिचानलाई विश्वसामु पुर्याउन पनि नेपालले कूटनीतिक क्षेत्रलाई सुदृढ बनाउनुपर्ने आवश्यक्ता औंल्याएका हुन् ।

संयुक्त राष्ट्र संघको स्थापना दिवसको अवसर पारेर आइतबार काठमाडौंमा आयोजित कार्यक्रममा बोल्दै पूर्वउपप्रधानमन्त्रीसमेत रहेका रावलले कूटनीतिको ‘क’ पनि नजान्नेहरू राजदूत भएर विभिन्न देश गएको देख्दा आफूलाई दुःख लागेको बताए । उपाध्यक्ष रावलले देशको पहिचान मेटाएर आफ्नो पहिचान भेटाउने प्रयास नगर्न पनि कूटनीतिज्ञहरूलाई सचेत गराए । 

‘मैले यस्ता राजदूत देखेको छु, जसलाई अंग्रेजीको ‘अ’ आउँदैन । कूटनीतिको ‘क’ आउँदैन । मेरो देश नेपाल हो, यो नेपालको हितमा हुनुपर्छ भनेर बोल्न सक्दैन । ऊ नै राजदूत बनेर जाने गरेको छ,’ रावलले भने, ‘यस्तो देख्दा मलाई दुःख लागेको छ ।’ 

उपाध्यक्ष रावलले विश्व शान्तिका लागि परिचालन हुने सुरक्षाकर्मीहरूको सेवा र सुरक्षाको उचित व्यवस्थाका लागि संयुक्त राष्ट्र संघसँग पहल गर्न सरकारलाई सुझाव दिए । आफू रक्षामन्त्री हुँदा त्यसका लागि पहल गरे पनि समय अभावमा कारण काम गर्न नसकिएको उनले स्पष्ट पारे ।