उम्मेद्वारी दर्तापछि अनुपम फुडल्याण्‍डमा शेखर टिमको छलफल

फाइल फोटो

काठमाडौँ - सभापतिमा उम्मेद्वारी दर्ता गरेपछि बत्तीसपुतलीस्थित अनुपम फुडल्याण्डमा शेखर कोइराला पक्षको भेला आयोजना गरिएको छ । उम्मेद्वारी दर्ता गरेपछि शेखरसहित उपसभापति र महामन्त्रीमा उम्मेद्वारी दर्ता गरेका नेताहरुको छलफल अनुपममा सुरु भएको हो ।

शेखरकाे प्यानलबाट धनराज गुरुङ र चन्द्र भण्डारीले उपसभापतिमा उम्मेद्वारी दिएका छन् । यस्तै महामन्त्रीकाे उम्मेदवारमा गगन थापा र मिनेन्द्र रिजाल छन् । यस्‍तै सह-महामन्त्रीमा देवराज चालिसे, कमला पन्त, विकास लामा,  बद्री पाण्डे लगायत उम्मेदवार छन् । 

यसअघि हिजो पनि मध्यरातसम्म अनुपममा साझा उम्मेद्वार उठाउने विषयमा छलफल भएको थियो । तर कुनै निष्कर्ष ननिस्केपछि संस्थापन इतरबाट शेखर कोइराला र प्रकाशमान सिंहले छुट्टाछुट्टै उम्मेद्वारी दर्ता गराएका हुन् ।

उम्मेद्वारी दर्तापछि कसरी प्यानलसहित चुनाव जित्ने भन्ने विषयमा छलफल चलिरहेको एक नेताले जानकारी दिए । सभापतिमा शेखरसँगै प्यानलमा अरु उम्मेद्वार पनि बलिया देखिएकाले संस्थापन इतर पक्ष आशावादी देखिएको छ ।