‘स्पाइडरमेन’ अभिनेता भन्छन्, ‘कामबाट आराम लिन्छु र सन्तान जन्माउँछु ।’

लसएन्जल्स- ‘स्पाइडरमेन : नो वे होम’ आजबाट संसारभर रिलिज भएको छ । तर, अपेक्षाभन्दा पर रहेर यो फिल्मले आश्चर्यजनक व्यापार गरिरहेको छ । एडभान्स बुकिङमा नै अभूतपूर्व दर्शकको चासो भेटेको यो फिल्मले ‘एभेन्जर एन्डगेम’को व्यापारलाई उछिन्ने अनुमान गरिएको छ ।

यता फिल्मले अभूतपूर्व सफलता पाइरहँदा यसका मुख्य अभिनेता टम होलेन्डले भने अभिनयबाट केही समयलाई विश्राम लिने मन बनाएको बताएका छन् । उनले पिपुल म्यागजिनलाई दिएको अन्तर्वार्तामा आफूले केही समयलाई कामबाट आराम चाहेको र योबीचमा सन्तान जन्माउने इच्छा रहेको बताएका छन् । 

‘ मैले करिअरका लागि भनेर रातदिन नभनी ६ वर्ष खटेँ । अब म कामबाट फुर्सद लिएर परिवार सुरु गर्न चाहान्छ र विश्वका लागि के गर्न सकिन्छ चिन्तन गर्न चाहान्छु’ उनले भनेका छन् ।

टमले ‘स्पाइडरमेन’ सिरिजकै सह कलाकार जेन्दयालाई मन पराएको कुरा सर्वविदितै छ । उनले आफूलाई केटाकेटी मन पर्ने भएकाले चाँडै पिता बन्ने कुरा पनि सोचिरहेको बताएका छन् । 

‘मलाई बच्चा मन पर्छ । मलाई बाबु बन्न आतुरी छ । म कुर्न सक्छु तर कुर्ने पक्षमा छैन,’ उनले भनेका छन्, ‘यदि म विवाहको पार्टीमा छु भने म बच्चाको टेबलमा हुन्छु । यदि म अभिनयमा हुन्नथेँ भने म प्राइमरी स्कुलको टिचर हुन्थेँ ।’२० वर्षको उमेरमै करिअर सुरु गरेका टम अहिले २५ वर्षका छन् । ‘स्पाइडरमेन ः नो वे होम’ पछि टमको मार्क ह्वेलवर्गसँग खेलेको ‘अनचार्टेड’ रिलिज हुँदैछ ।