पीएसजीले जित्यो सिजनको पहिलो उपाधि

काठमाडौं : पीएसजीले ट्रफी डेस च्याम्पियन्स अर्थात फ्रेञ्च सुपर कपको उपाधि जितेको छ । बुधबार राती भएको फाइनलमा मार्सेलीलाई २-१ गोल अन्तरले हराउँदै पीएसजीले डेस च्याम्पियन्सको ट्रफी उचालेको हो । गएको बर्ष च्याम्पियन्स लिगको फाइनल पुगेर पनि हारेको पीएसजीले यसपटक सिजनको पहिलो उपाधिका रुपमा डेस च्याम्पियन ट्रफी हात पारेको हो ।

पिएसजीलाई उपाधि दिलाउने जितमा माउरो इकार्डी र नेयमारले गोल गरे । मार्सेलीका दिमित्री पेयटले एक गोल फर्काए । पिएसजीले सर्वाधिक धेरै १० पटक डेस च्याम्पियन्सको उपाधि जितेको छ । फ्रेन्च लिग वान विजेता पीएसजी र कोपा डी फ्रान्सको विजेता मार्सेलीले ट्रफी डेस च्याम्पियन्सको फाइनल खेलेका हुन् । (अन्तराष्ट्रिय सञ्चारमाध्यमको सहयोगमा)