मृगलाई ताकेर हानेको गोली लागेर बालकको मृत्यु

प्रतिकात्मक तस्वीर

बुटवल : पाल्पामा शिकार खेल्न जंगल गएका युवाहरूले मृग मार्न पड्काएको गोली लागेर एक बालकको ज्यान गएको छ । मृगलाई ताकेर हानेको भरूवा बन्दुकको छर्राले लागेर बालकको मृत्यु भएको हो । 

मृत्यु हुनेमा जिल्लाको रिब्दीकोट गाउँपालिका–८ दानसिङडाँडाका १३ वर्षीय लक्ष्मण छहारी रहेको जिल्ला प्रहरी कार्यालय पाल्पाका सूचना अधिकारी लक्ष्मण पचभैयाले जानकारी दिए । शिकार खेल्न सामुदायकि वनमा पुगेका बेला राति ९ बजे उनलाई छर्राले लागेको थियो । उनको घटनास्थलमै मृत्यु भएको हो । 

शिकार खेल्न गएका अन्य तीन जनालाई प्रहरीले नियन्त्रणमा लिएको छ । रैनादेवी छहरा गाउँपालिका–४ भर्माटुङ बस्ने १७ वर्षीय  ज्ञानबहादुर गाहा, १४ वर्षीय कमल राना, रिब्दीकोट गाउँपालिका–८  दानसिङडाँडाका १३ वर्षीय देवबहादुर गाहालाई नियन्त्रणमा लिएको उनले बताए । घटनामा प्रयोग भएको बन्दुक बरामदगरी घटनाबारे अनुसन्धान गरिरहेको पाल्पा प्रहरीले जनाएको छ ।