६ महिनामा ५ खर्ब राजस्व उठ्ने अनुमान, १४ प्रतिशत वृद्धि सम्भव छ ?

काठमाडौं : सरकारले चालु आर्थिक वर्षको बाँकी ६ महिनामा (माघ-असार) पाँच खर्ब ९ अर्ब ६१ करोड रुपैयाँ राजस्व उठ्ने अनुमान गरेको छ । अर्थ मन्त्रालयले चालु आर्थिक वर्षको बजेटको अर्धवार्षिक समीक्षा मार्फत बाँकी अविधमा संकलन हुने राजस्वको अनुमान सार्वजनिक गरेको हो ।

पहिलो ६ महिनासम्म आर्थिक क्रियाकलापमा सुधार हुन नसकेका कारण लक्ष्यको तुलनामा कम राजस्व संकलन हुने समीक्षा प्रतिवेदनमा उल्‍लेख छ । यो आवमा ९ खर्ब ५९ अर्ब ६८ करोड रुपैयाँ मात्रै राजस्व संकलन हुने अनुमान छ । यो वार्षिक अनुमानको ९४.८५ प्रतिशत हो ।

गत आर्थिक वर्षको कुल राजस्व संकलनको तुलनामा १४ प्रतिशत बढी नै राजस्व संकलन हुने अर्थ मन्त्रालयले जानकारी दिएको छ ।

 

१४ प्रतिशत वृद्धि सम्भव छ ?
कोभिड-१९ को प्रभावबाट अर्थतन्त्र अझै प्रभावित भइरहेको अवस्थामा अर्थ मन्त्रालयले भने पोहोरको तुलनामा १४ प्रतिशत राजस्व संकलन हुने अनुमान गरेको छ ।

अर्थले संशोधित लक्ष्य पुरा गर्न सक्ने केही आधार समेत खुलाएको छ । कोभिड-१९ प्रभाव न्यून हुँदै गएको र पैठारीको परिमाण पनि वृद्धि हुँदै गएकोले आयातबाट प्राप्त हुने राजस्वमा सुधार हुने उसको भनाइ छ ।

उद्योग व्यापार र सेवा क्षेत्र क्रमश: सुचारू हुँदा आन्तरिक राजस्व संकलनमा सकारात्मक प्रभाव पर्ने प्रतिवेदनमा उल्लेख छ । त्यसबाहेक सरकारको खर्च वृद्धि हुँदै जाँदा माग सिर्जना भई उपभोगमा आधारित कर संकलनमा समेत सकारात्मक प्रभाव पर्ने भनिएको छ ।

राजस्व संकलनको वैकल्पिक कार्ययोजना सहित राजस्व प्रशासन परिचालन हुने हुँदा राजस्व संकलनमा वृद्धि हुनेमा अर्थ मन्त्रालयले जनाएको छ । सरकारले प्रदान गर्ने सेवा क्रमश: सुचारू हुने हुँदा संकुचन हुन गएको गैरकर राजस्वमा सुधार हुने उल्लेख छ । त्यसबाहेक आन्तरिक ऋण बजेटमा अनुमान गरे अनुसार नै परिचालन सक्ने बताइएको छ ।

वैदेशिक सहायतामा ठूलो हिस्सा बजेटरी सहायताको रहेकोले प्राप्त हुने सुनिश्चितता रहेको प्रतिवेदनमा छ । ठूला परियोजनामा परिचालन हुने वैदेशिक सहायता चालु आर्थिक वर्षको बाँकी अवधिमा शोधभर्ना प्राप्त हुने भनिएको छ ।