आर्सनलको शानदार जित, म्यानचेष्टर युनाईटेडको बराबरी

काठमाडौँ : इंग्लिस प्रिमियर लिग फुटबलमा आर्सनलले शानदार जित हात पारेको छ । पिर्रे एमरिक आयुबाम्याङले ह्याट्रिक गरेको खेलमा आर्सनलले लीड्स युनाईटेडलाई ४-२ गोलले हराएको हो ।

आर्सनलको जितमा ह्याट्रिक गरेका आउबाम्याङले खेलको १३, ४१ र ४७ औँ मिनेटमा गोल गरे । एक गोल भने हेक्टर बेलेरिनले गरे । यस्तै लीड्सका लागि पास्कल इस्टुज्रिक र हेल्डर कोस्टाले गोल गरे । जितसँगै आर्सनल २४ खेलबाट ३४ अंकसहित लिगको १० औँ स्थानमा छ । हार व्यहोरेको लीड्स भने २३ खेलबाट ३२ अंकसहित लिगको ११ औँ स्थानमा छ । 

प्रिमियर लिगकै अर्को खेलमा म्यानचेष्टर युनाईटेडले वेष्ट ब्रोमिचसँग बराबरी खेलेको छ । आइतबार राती भएको खेलमा म्यान्युले वेष्ट ब्रोमिचसँग एक एक गोलको बराबरी खेलेको हो । खेल सुरु भएको दुई मिनेटमै एमबाय डिग्नीले गोल गरेपछि वेष्ट ब्रोमिचले अग्रता लिएको थियो ।

पहिलो हाफको ४४ औँ मिनेटमा म्यानेष्टर युनाईटेडका लागि ब्रुनो फर्नाण्डेजले बराबरी गोल गरे । पहिलो हाफ बराबरीमा सकिदा दोस्रो हाफमा दुवै टोलीले गोल गर्न नसक्दा अंक बाड्न बाध्य भएका हुन् ।

बराबरीले पनि म्यान्चेष्टर युनाईटेड २४ खेलबाट ४६ अंकसहित दोस्रो स्थानमा उक्लिन सफल भएको छ । समान अंक भएपनि लेस्टर सिटी गोल अन्तरका आधारमा तेस्रो स्थानमा धकेलिएको छ । शनिबार राती लिभरपुलमाथि शानदार जित निकालेको लेस्टर सिटी केही समयका लागि दोस्रो स्थानमा थियो । ४० अंकसहित लिभरपुल चौथो स्थानमा छ । वेष्ट ब्रोमिच भने रेलिगेसन जोनमा छ । 

२३ खेलबाट ५३ अंक जोडेको म्यानचेष्टर सिटी प्रिमियर लिगको शीर्ष स्थानमा छ ।