मुख्यमन्त्री राउत भन्छन्- 'केन्द्रको निर्णय हो, जो आए पनि स्वागत गर्छौं'

काठमाडौँ : प्रदेश-२ का मुख्यमन्त्री लालबाबु राउतले प्रदेश प्रमुख पदमुक्त र नयाँ नियुक्तको विषयमा केन्द्रको निर्णय मान्‍ने बताएका छन् । इकागजसँग फोनमा कुरागर्दै मुख्यमन्त्री राउतले प्रदेशमा जो-जस्तो व्यक्ति प्रमुख बनेर आएपनि स्वागत गर्ने प्रतिक्रिया दिएका हुन् ।

'केन्द्र सरकारले निर्णय गरिसकेको छ, के भन्नू ? हामी जो सुकै प्रमुख आएपनि स्वागत गर्छौं,' मुख्यमन्त्री राउतले भने । राष्ट्रपति विद्यादेवी भण्डारीले शुक्रबार परियारलाई पदमुक्त गरेर डा.राजेश झालाई नयाँ प्रमुखमा नियुक्त गरेकी छन् ।

सत्तारुढ नेकपामा देखिएको फुटले प्रदेशको प्रमुख परिवर्तन गरेको चर्चा राजनीतिक वृत्तमा भइरहेको छ । राउत जनता समाजवादी पार्टीबाट मुख्यमन्त्री भएका व्यक्ति हुन् । प्रदेश दुईको सत्तारुढ दल पनि यो समाचार तयार पार्दासम्म केही बोलेको छैन । अर्कोतर्फ  प्रदेश प्रमुख पदमुक्त र नयाँ नियुक्ति गरेको विषयमा प्रमुख प्रतिपक्षी नेपाली कांग्रेसले आपत्ति जनाएको छ ।