१९ अर्ब ५९ करोडको सोयाबिन तेल निर्यात

चालु आर्थिक वर्षको ७ महिनामा यस्तो छ देशको आर्थिक तथा वित्तीय अवस्था

काठमाडौँः चालु आर्थिक वर्षको पहिलो सात महिनामा १९ अर्ब ५९ करोड रुपैयाँको सोयाबिन तेल निर्यात भएको छ । यो अवधिमा नेपालले २० अर्ब ९६ करोड रुपैयाँको कच्चा सोयाबिन तेल आयात गरेको छ । 

कच्चा तेल प्रशोधन गरी नेपालले भारतमा निकासी बढाएको हो । नेपाल र भारतको भन्सार दरको भिन्नताका कारण सोयाबिन तेलको निकासी बढेको जानकारहरू बताउँछन् । सोयाबिन तेल निकासी गर्दै आएका उद्योगीहरूले भने कच्चा तेल आयात गरेर ३० प्रतिशत गुणवत्ता वृद्धि (भ्यालु एड) गरेर भारतमा निकासी भैरहेको बताए । 

सोयाबिन तेलको कुल निर्यातमा २८ प्रतिशत हिस्सा रहेको छ । गत वर्षको सोही अवधि (साउन–माघ) को तुलनामा २२९.५ प्रतिशतले निर्यात वृद्धि भएको हो ।  
सोयाबिन तेलबाहेक नेपालका मौलिक उत्पादनहरूको निर्यातमा सुधार हुन सकेको छैन । यद्यपि अलैंचीको निर्यात भने गत वर्षको तुलनामा ४८ प्रतिशतले वृद्धि भई ४ अर्ब २४ करोडको निकासी भएको छ । 

समग्र निर्यातलाई सोयाबिन तेलले उकासेको छ । यस वर्ष पहिलो सात महिनामा नेपालको कुल निर्यात ६९ अर्ब ९१ करोड रुपैयाँ छ । गत वर्षको सोही अवधिको तुलनामा निर्यात ७.६ प्रतिशतले बढेको हो । 

सबैभन्दा ठूलो आयात पेट्रोलियम पदार्थको आयात भने यो वर्ष पहिलो सात महिना (साउन–माघ) मा २७.३ प्रतिशतले घटेको छ । साउनदेखि असोजसम्म जिल्ला प्रशासनले लागू गरेको बन्दाबन्दीका कारण यातायात सुचारु हुन सकेको थिएन, जसका कारण यो वर्ष खपत कम देखिएको हो । गत वर्ष यो अवधिमा १ खर्ब १० अर्बको पेट्रोलियम आयात भएकोमा यो वर्ष ८० अर्ब ३९ करोडको पेट्रोलियम आयात भएको छ । 

पेट्रोलियम आयात मूल्यमा कम देखिनुमा यसको घटेको बजार मूल्य पनि हो । अन्तर्राष्ट्रिय बजारमा महामारीसँगै पेट्रोलियमको मूल्यमा भारी गिरावट आएको थियो, जुन पुनः उकालो लाग्ने क्रममा छ । अन्तर्राष्ट्रिय बजार मूल्य वृद्धि भइरहेकाले आगामी दिनमा पेट्रोलियमको आयात (मूल्य) मा वृद्धि हुने देखिएको छ । 
समग्र आयात भने गत वर्षकै हाराहारीमा ८ खर्ब ३ अर्ब ६४ करोड रहेको छ ।