नेकपा एसको बैठकमा उठ्यो ​सरकारमा सहभागी मन्त्रीहरूको कार्यशैली र आचरणमाथि प्रश्न

काठमाडौँ – नेकपा (एकीकृत समाजवादी) केन्द्रीय कमिटीको बैठकमा पार्टीका तर्फबाट सरकारमा सहभागी मन्त्रीहरूको कार्यशैलिमाथि प्रश्न उठेको छ । बिहीबार काठमाडौँमा जारी समाजवादीको बैठकमा समूहगत छलफलको निष्कर्ष राख्ने क्रममा पार्टीका तर्फबाट सरकारमा सहभागी मन्त्रीहरूको कार्यशैली र आचरणमा प्रश्न उठेको हो ।

पार्टीको निर्देशन र आचारसंहिताविपरित मन्त्रीहरूले काम गर्ने गरेको र पार्टीसँगको तालमेल मिल्न नसकेकोलगायतका प्रश्न उठेको समाजवादीका नेता गंगालाल तुलाधरले जानकारी दिए । 

उनका अनुसार अब पार्टीभित्र एमसीसीको विवाद सकिएको र सम्मानीत नेता झलनाथ खनालले पनि अन्य सन्दर्भमा छलफल गर्न उपयुक्त हुने बताएका छन् । त्यस्तै स्थानीय निर्वाचनका लागि र प्रतिगामी तत्वहरूलाई प्ररास्त गर्न गठबन्धनलाई कायमै राखनुपर्ने सुझाव आएको तुलाधरले बताए ।

यसअघि पार्टी अध्यक्ष माधवकुमार नेपालले बुधबार प्रस्तुत गरेको राजनीतिक प्रस्तावमाथि नौ वटा समूह बनाएर केन्द्रीय सदस्यहरूले छलफल गरेका थिए ।