कमरेड बनिन् करिष्मा

नयाँशक्ति पार्टी छाडेर अध्ययनमा लागेकी करिष्मा मानन्धरले फेरि एक पटक पार्टी राजनीति सुरु गरेकी छिन् । केही समयअघि देखि एमाले अध्यक्ष केपी शर्मा ओलीसँग भेटघाट तीव्र बनाएकी करिष्माले अन्ततः उनकै हातबाट खादा पहिरिँदै एमाले प्रवेश गरेकी हुन् । ओलीले खाँदा लाइदिनुअघि करिष्मालाई एमाले महासचिव शंकर पोखरेलबाट टीका लगाएकी थिइन् ।

करिष्माले फागुन २६ मा ओलीसँग बालकोटमा भेट गर्दै पार्टी प्रवेश गर्ने मिति  टुंग्याएकी छिन् । उसबेला बालकोट स्रोतले चैत ९ गते एमाले प्रवेश गर्ने तयारी भइरहेको जनाएको थियो । तर एक दिन अगावै उनले पार्टी प्रवेश गरेकी हुन् । उनले उसबेला आफ्नो टिमसहित नै पार्टी प्रवेश गर्ने जानकारी गराएकी थिइन् ।

 
करिष्माले अभिनय करिअरको उत्तरार्धमा राजनीति गर्ने भन्दै बाबुराम भट्टराई नेतृत्वको नयाँ शक्ति पार्टीको सदस्यता लिएकी थिइन् । तर पछि उनी सो पार्टीबाट अलग भएकी थिइन् । बीचमा सामाजिक सञ्जालमा राजनीतिप्रति वितृष्णा पोख्ने गरेकी करिष्मा एमाले अध्यक्षसँगको भेटपछि पुनः राजनीतिमा फर्कन राजी भएकी हुन् ।