भोलि कांग्रेसको पदाधिकारी बैठक, पौडेल समूहले आजै गर्‍यो छलफल

फाइल तस्बिर

काठमाडौँ  :  नेपाली कांग्रेसले पदाधिकारी बैठक बोलाएको छ ।  पार्टी केन्द्रीय कार्यालयका मुख्यसचिव कृष्णप्रसाद पौडेलका अनुसार सोमबार दिउँसो २ बजे पार्टी कार्यालय सानेपामा पदाधिकारी तथा पूर्वपदाधिकारीहरुको बैठक तय भएको हो । सभापति शेरबहादुर देउवाले पदाधिकारी तथा पूर्वपदाधिकारीहरुको बैठक बोलाएसँगै वरिष्ठ नेता रामचन्द्र पौडेल समूहले आजै छलफल गरेको छ ।  

‘अहिलेको राजनीतिक घटनाक्रमको विषयमा छलफल गर्न पदाधिकारी बैठक बस्न लागेको हो’ मुख्यसचिव पौडेलले इकागजसँग भने । उता वरिष्ठ नेता पौडेल निवास बोहोराटारमा बसेको बैठकमा पौडेलसहित पार्टी महामन्त्री डा. शशांक कोइराला, कोषाध्यक्ष सीतादेवी यादव, पार्टी केन्द्रीय सदस्य रामशरण महत, मिनेन्द्र रिजाल सहभागी थिए । आगामी भदौमा पार्टीको १४ औँ महाधिवेशन तोकिए पनि पार्टीमा त्यसको विषयमा छलफल तयारी नभएको भन्दै छलफलमा जुटेको पौडेल पक्षले जनाएको छ ।  

‘वर्तमान राजनीति घटनाक्रमको विषयमा इन्फर्मल छलफल भयो,’ रामशरण महतले इकागजसँग भने, ‘त्यस्तो खास त केही भएन अब कसरी अगाडि जान सकिन्छ भनेर हामी २÷४ जना छलफलमा जुटेका हौँ ।’पौडेल समूहले भोलि पदाधिकारी बैठक अघि पनि छलफल गर्ने तयारी गरेको छ ।