बालुवाटार पुगेका जसपाका नेतालाई प्रधानमन्त्री ओलीले के भने ?

काठमाडौँ : विगतमा भएका सहमति र सत्ता सहकार्यका विषयमा जनता समाजवादी पार्टीका नेताहरुले प्रधानमन्त्री केपी शर्मा ओलीसँग छलफल गरेका छन् । मंगलबार बालुवाटार पुगेका जसपाका नेताहरुले प्रधानमन्त्री ओलीसँग विगतमा भएका सहमति कार्यान्वयन तथा आगामी सत्ता सहकार्यका विषयमा छलफल गरेका हुन् ।  

छलफलका क्रममा जसपाका नेताहरुले बन्दी रिहाई, नागरिकता र संविधान संशोधनका विषयमा यसअघि भएका सहमति कार्यान्वयन गर्न माग गरेका थिए । बन्दी रिहाईका विषयमा सांसद समेत रहेका टीकापुर घटनाका मुख्य योजनाकार रेशम चौधरीलाई रिहाई गर्नुपर्ने जसपाका नेताहरुको माग थियो ।

जवाफमा प्रधानमन्त्री ओलीले ‘सरकारमा आउनुस, सहमति कार्यान्वयन गरौँला’ भनेर बताएको जसपाका नेता लक्ष्मणलाल कर्णले इकागजलाई बताए । उनका अनुसार ओलीले उधारो सहमति गर्ने भएपनि अब काम हेरेपछि सत्ता समीकरणका विषयमा थप अगाडि बढेर कुरा गर्न सकिने जसपाका नेताहरुले बताएका थिए ।

अहिलेको अवस्थामा काम गर्ने र आफूसँग भएका सहमति कार्यान्वयन गर्ने पार्टीसँग मात्रै सत्ता सहकार्य हुने नेता कर्णले बताए । प्रधानमन्त्री ओलीलाई भेट्न उपेन्द्र यादव, महन्थ ठाकुर, राजेन्द्र महतो, लक्ष्मणलाल कर्ण लगायतका नेताहरु बालुवाटार पुगेका थिए ।