महेशबाबु भन्छन् –हिन्दी फिल्म खेलेर म किन समय बर्बाद गरुँ ?

मुम्बई - तेलगु फिल्मका अभिनेता महेशबाबुले आफूलाई हिन्दी फिल्म खेल्ने अफर प्रशस्त आउने गरेको भए पनि आफू दक्षिण भारतीय फिल्म छाडेर कतै पनि नजाने बताएका छन् । सोमबार एउटा फिल्मको ट्रेलर सार्वजनिक कार्यक्रममा उनलाई बलिउड फिल्म किन नगरेको भन्ने प्रश्नमा उनले बलिउड फिल्मले आफूलाई धान्नै नसक्ने बताएका छन् ।

‘मैले हिन्दीबाट टन्नै अफर पाउने गरेको छु । तर मलाई लाग्दैन कि उनीहरूले मलाई धान्न सक्छन् । जुन उद्योगले मलाई धान्न सक्दैन त्यहाँ समय बर्बाद गर्नुको कुनै अर्थ छैन,’ उनले भनेका छन्, ‘यहाँ दक्षिणमा मेरो स्टारडम र सम्मान धेरै ठूलो छ । मैले यो उद्योग छाडेर अन्त कतैको उद्योग जाने सोचेको पनि छैन । मैले सधैँ यहाँ राम्रा फिल्म गर्ने सोचेको थिएँ र त्यो यहीँ भइरहेको छ । म यहीँ खुसी छु ।’

उनले ओटिटी प्लेटफर्ममा डेब्यू गर्ने प्रश्नमा पनि आफू ठूलो पर्दाका लागि बनेकाले ठूलो पर्दामा नै काम गरिरहने र ओटीटीमा काम गर्ने सम्बन्धमा नसोचेको बताएका थिए । महेशबाबुको अभिनय रहेको ‘एसभीपी’ आउँदो शुक्रबार रिलिज हुँदैछ । उनले आउँदो फिल्म भने एसएस राजामौलीसँग गर्दैछन् ।