मुम्बई -शाहरुख खान र आलिया भट्ट मिलेर निर्माण गरेको फिल्म ‘डार्लिङ्ग’लाई नेटफ्लिक्सले महंगो रकममा किनेको छ । पिंकभिल्लाका अनुसार आलियाले शाहरुख खानको रेड चिल्ली इन्टरटेनमेन्टसँग मिलेर बनाएको फिल्मलाई नेटफ्लिक्सले ८० करोड भारतीय रुपैयाँमा किनेको छ ।

हिरोइन मुख्य भूमिकामा रहेको फिल्मलाई ओटिटीले महंगो रकममा किनेको यो दुर्लभ घटना मानिएको छ । यसअघि दीपिका पादुकोन र अनन्या पाण्डेको मुख्य भूमिका रहेको ‘गहराइँया’लाई पनि अमेजन प्राइमले सोही हाराहारी रकममा किनेको चर्चा छ । 

यो फिल्मको अहिले पोस्ट प्रडक्सन चलिरहेको छ । फिल्ममा आलिया भट्ट र सेफाली शाह मुख्य भूमिकामा छन् । फिल्मले आमाछोरीको सम्बन्धको कथा पेस गर्छ । 
फिल्मलाई जस्मित के रिनले निर्देशन गरेका हुन् भने फिल्ममा संगीत निर्देशक विशाल भारद्धाजको रहेको छ । आलियाको चाँडै नै ‘गंगुबाई कठैयावाडी’ रिलिज हुँदैछ । यसबाहेक आलिया ‘आरआरआर’ र ‘रक्की और रानीकी प्रेमकहानी’ पनि देखिँदैछिन् ।