लुम्बिनीका मुख्यमन्त्री पोखरेलविरुद्ध अविश्वासको प्रस्ताव दर्ता गर्न दलहरू छलफलमा

काठमाडौँ  :  लुम्बिनी प्रदेशका मुख्यमन्त्री शंकर पोखरेलविरुद्ध अविश्वासको प्रस्ताव गर्न दलहरु छलफलमा जुटेका छन् ।  नेपाली कांग्रेस, माओवादी केन्द्र र जनता समाजवादी पार्टीका सांसदहरुले मुख्यमन्त्री पोखरेलविरुद्ध अविश्वासको दर्ता गर्न छलफल गरेका हुन् । 

‘अविश्वासको प्रस्ताव दर्ता गर्न हामी छलफलमै छौँ,’ नेपाली कांग्रेसका सांसद तथा संसदको सार्वजनिक लेखासमितिका सभापति डिल्ली चौधरीले भने, ‘आज नै अविश्वासको प्रस्ताव गर्ने तयारी  छ ।’ 

८७ सदस्यीय लुम्बिनी प्रदेश सभामा नेकपा एमालेका ४१ सांसद छन् । नयाँ सरकार गठन गर्नका लागि ४४ सांसद चाहिन्छ । यहाँ नेकपा माओवादी केन्द्रका २०, नेपाली कांग्रेसका १९, जनता समाजवादी पार्टीका ६ र जनमोर्चाका १ सांसद छन् ।   

गण्डकीमा नेपाली कांग्रेस, माओवादी केन्द्र, जसपा र जनमोर्चा मिलेर एमालेका मुख्यमन्त्रीविरुद्ध अविश्वासको प्रस्ताव दर्ता गरेपछि उक्त रणनीति लुम्बिनीमा पनि हुने देखिन्छ । सोही कारणले मुख्यमन्त्री पोखरेल जोखिममा छन् ।