ड्रागन खेतीबाट वार्षिक १६ लाखसम्म आम्दानी गर्दै कर्णालीका मुख्यमन्त्री

सुर्खेत- कर्णाली प्रदेश सरकारका मुख्यमन्त्री राजकुमार शर्माले ड्रागन खेतीबाट मनग्य आम्दानी गरेको बताएका छन् ।

शर्माले वार्षिक रूपमा ड्रागन खेतीबाटै १६ लाखसम्म आम्दानी गर्दै आएका छन् । शर्माले आफ्नो सम्पत्ति विवरण सार्वजनिक गर्दै ड्रागन खेती गर्दै आएको जनाएका छन् । मुख्यमन्त्री शर्माले आठ वर्षअघि लमही नगरपालिका दाङमा ६ सय बेर्ना लगाएर ड्रागन खेतीकाे सुरुवात गरेका हुन् ।

उक्त समयमा बेर्ना खरिद लगायतका सामग्रीमा तीन लाख रुपैयाँ खर्च भएको उनको विवरणमा उल्लेख छ । मुख्यमन्त्री शर्माको अचल सम्पत्तिमा श्रीमती प्रतिभा केसीको नाममा दाङको लमही नगरपालिका– १ मा ३५७२.९१ वर्गमिटर जग्गा रहेको उल्लेख छन् । सो जग्गा पैतृक सम्पत्तिबाट आर्जन गरिएको उल्लेख छ ।

यस्तै रुकुमको चौरजहारी नगरपालिका–१४ मा बाबु चन्द्रप्रकाश शर्माको नाममा अन्दाजी ४ देखि ५ रोपनी र रुकुमपश्चिमकै वडा नम्बर २ मा २१२० वर्गमिटर आफ्नो नाममा रहेको छ । यसको स्रोत पैतृक, कृषि आय र सेवा सुविधाबाट प्राप्त भएको उल्लेख छ ।

मुख्यमन्त्री शर्माले कसैलाई पनि तिर्न बाँकी ऋण नभएको उल्लेख गरेका छन् भने कुनै पनि कम्पनीमा उनको सेयर लगानी समेत नभएको उल्लेख गरेका छन् । उनले रुकुमको मुसिकोटमा रहेको नेपाल बैंकमा पाँच लाख नगद रहेको सम्पत्ति विवरणमा उल्लेख गरेका छन् । यो रकम उनको पारिश्रमिकबाट प्राप्त भएको बताइएको छ । उनी यसअघि रुकुम पश्चिमको जिल्ला समन्वय प्रमुखसमेत भइसकेका हुन् ।