बजेट विकृत पुँजीवादमा आधारित छ : उपेन्द्र यादव

काठमाडौँ–जनता समाजवादीका अध्यक्ष तथा सांसद उपेन्द्र यादवले सरकारले ल्याएको बजेट विकृत पुँजीवादमा आधारित रहेको बताएका छन् । बुधबार प्रतिनिधिसभामा सरकार आगामी आर्थिक वर्षका लागि ल्याएको बजेटमाथि भइरहेको छलफलमा भाग लिँदै उनले यस्तो बताएका हुन् । 

‘यो बजेट वास्तवमा समाजवाद उन्मुख छँदैछैन,’ उनले भने, ‘बजेट विकृत पुँजीवादी या नवउदारवादी सिद्दान्तमा आधारित छ । यहाँ दुई तिहाइभन्दा बढी प्राइभेट सेक्टरको अधिन रहेको छ ।’

यस किसिमको बजेटले समाजवाद उन्मुख बाटो पहिल्याउन नसक्ने उनको भनाइ छ । ‘यस किसिमको बजेटले समाजवाद उन्मुख बाटो पकड्न सक्दैन,’ उनले भने, ‘समाजवाद उन्मुख होइन विमुख बजेट छ ।’   

यो बजेटबाट सरकारले राखेको आर्थिक वृद्धिदरको लक्ष्य पूरा नहुने उनले बताए ।