संघीय शिक्षा विधेयक मन्त्रिपरिषदमा दर्ता भइसक्यो, छिट्टै सदनमा आउँछ : मन्त्री राई

काठमाडौँ– शिक्षा विज्ञान तथा प्रविधि मन्त्री अशोककुमार राईले संघीय शिक्षा ऐन क्याबिनेटमा दर्ता भइसकेको र छिट्टै संसदमा दर्ता हुने छन् । मंगलबार शिक्षा विज्ञान तथा प्रविधि मन्त्रालयको विनियोजन शीर्षकमाथि उठेका प्रश्नको जवाफ दिँदै राईले छिट्टै संसदमा दर्ता हुने बताए । 

‘संघीय शिक्षा ऐन सदनमा कहिले आउँछ भनेर प्रश्न सोध्नु भएको छ । मैले यसबारे पहिले पनि भनिसकेको छु । ४ गते उक्त विधेयक मन्त्रिपरिषदमा दर्ता भइसकेको छ, संसदमा ल्याउन अनुमतिका लागि,’ उनले भने, ‘आज १२ गते हो । मलाई लाग्छ, आजको क्याबिनेटमा आइसक्यो होला । मन्त्रिपरिषदले अनुमति दिनेबित्तिकै दर्ता हुन्छ ।’

संसदमा एमाले संसदीय दलका सचेतक महेश बर्तौलासहित विभिन्न सांसदले संघीय शिक्षा ऐनबारे प्रश्न सोधेका थिए ।