‘ओएमजी २’ले पनि कमायो सय करोड, सय करोड क्लबमा यामीको ह्याट्रिक

मुम्बई - ‘गदर २’को चपेटामा परेका ‘ओएमजी २’ले पनि बक्स अफिसमा सय करोडको आँकडा पार गरेको छ । सुस्त सुस्त सुरुवात गरेको फिल्मले सोही लय कायम राख्दै दोस्रो हप्तामा सय करोडको आँकडा पार गरेको हो । 

दोस्रो हप्ताको विकेन्डमा २८ करोड थप्दै यो फिल्मले भारतमा मात्र १ सय १३ करोडको व्यापार गरेको हो । यो फिल्मले शुक्रबार ६ करोड, शनिबार १० करोड र आइतबार १२ करोडको व्यापार गरेको थियो ।

उता गदरले भने विकेन्डमा तीन दिनमा थप ९० करोड कमाइ गर्दै कुल कमाइ ३ सय ७५ करोड पुर्याएको छ । ‘ओएमजी २’ले सय करोड कमाएसँगै यामी गौतम अभिनित तेस्रो फिल्म सय करोड क्लबमा प्रवेश गरेको छ । यसअघि यामीको अभिनय रहेको ‘उरी : अ सर्जिकल स्ट्राइक’ र ‘बाला’ले सय करोडको आँकडा छोएका थिए । 

अक्षय कुमारको भने सय कराेड बढी कमाउने फिल्ममा ‘ओएमजी २’ १६ औँ नम्बरमा परेको छ । यसअघि उनी अभिनित १५ फिल्मले यो आँकडा छोएका छन् ।बीचको समयमा यामी गौतमले ओटीटीमा रिलिज हुने फिल्म गरेकी छिन् । यिनमा पनि ‘दसवी’ र ‘अ थस्र्डे’ले ओटीटीमा दर्शकको माया पाएका थिए । ‘ओएमजी २’मा यामी विपक्षी वकिल बनेकी छिन् । उनको भूमिका र अभिनय दुवैलाई लिएर दर्शकले तारिफ गरेका छन् ।