अक्षय कुमारले डिप्रेसनमा पुर्याएको रणदीप हुड्डाको आरोप

मुम्बई -  बलिउड अभिनेता रणदीप हुड्डाले  आफू एक समय डिप्रेसनको सिकार भएको  र यसको कारण  बलिउड खेलाडी अक्षय कुमार भएको आरोप लगाएका  छन् ।​ रणदीपका अनुसार  सन् २०१६ मा राजकुमार सन्तोषीको फिल्म  ‘ब्याटल अफ सारागढी’ को घोषणा भएको थियो र फिल्ममा रणदीप मुख्य भूमिकामा थिए । 

यसैबीच सन् २०१८ मा अक्षय कुमारले  ‘केसरी’ बनाए र सोही वर्ष फिल्म पनि रिलिज भयो ।  दुवैको कथा एउटै मुद्दामा आधारित थियो । बक्स अफिसमा‘केसरी’ सफल भयो जबकि रणदीपको फिल्म  रिलिज नै हुन सकेन । जसका कारण उनी निकै डिप्रेसनमा गएका थिए ।

अभिनेताले भने, ‘फिल्म बनाउन ३ वर्ष लाग्यो । मैले यो फिल्मका लागि  कडा मेहनत गरें। फिल्ममा ईशर सिंहको भूमिका निर्वाह गर्न मैले यी तीन वर्षमा कपाल र दाह्री बढाएँ । यो अवधिमा मैले धेरै फिल्मको अफर अस्वीकार गरें। फिल्म रिलिज नभएपछि म डिप्रेसनमा गएँ । मलाई कसैले ठूलो धोका दिएको जस्तो लाग्थ्यो ।

फिल्म रिलिज नहुँदा रणदिप हुड्डा निकै प्रभावित भएका थिए । कसैले दाह्री काट्छ कि भन्ने डरले कोठामा ताला लगाएको उनले बताए । अभिनेताले थप भने, ‘कतिसम्म भने मेरा आमाबुवाले मलाई एक्लै छोड्नुभएन। म यो कुराबाट धेरै प्रभावित हुन थालेँ। त्यसपछि मैले निश्चय गरें कि म यो डिप्रेसनको घटना दोहोराएर अब कहिल्यै हुन दिन्न।’ ​रणदीप हुड्डा चाँडै  ‘वीर सावरकर’मा देखिने छन्।