टी-ट्वान्टी सिरिजः पाकिस्तानविरुद्ध इंग्ल्यान्डको जित

काठमाडौँ- पाहुना टोली पाकिस्तानविरुद्धको दोस्रो टी-ट्वान्टी क्रिकेट खेलमा इंग्ल्यान्डले जित हात पारेको छ । शनिबार राति भएको दोस्रो खेलमा इंग्ल्यान्डले पाकिस्तानलाई २३ रनले पराजित गरेको हो ।

जितका लागि १ सय ८४ रनको लक्ष्य पछ्याएको पाकिस्तानले १९ ओभर २ बलमा सबै विकेट गुमाएर १ सय ६० रनमात्र बनाउन सक्यो ।

पाकिस्तानका लागि फकर जमानले ४५ रन तथा बाबर आजमले ३२ रन जोडे । इंग्ल्यान्डका रिसे टोप्लेले ३ तथा मोइन अली र जोफ्रा आर्चरले २-२ विकेट हात पारे ।

यसअघि टस हारेर पहिले ब्याटिङ गरेको इंग्ल्यान्डले निर्धारित २० ओभरमा ७ विकेटको क्षतिमा १ सय ८३ रन जोड्यो ।

इंग्ल्यान्डका लागि कप्तान जोश बटलरले ८४ रन तथा विल ज्याकले ३७ रन जोडे । पाकिस्तानका लागि शाहिन शाह अफ्रिदीले ३ तथा इमाद वासिम र हरिस राउफले २-२ विकेट हात पारे ।