विश्वकप वार्मअपः श्रीलंका र अफगानिस्तानको जित

काठमाडौँ- आईसीसी पुरुष टी-ट्वान्टी क्रिकेट विश्वकपअघिको 'वार्मअप' खेलमा श्रीलंका र अफगानिस्तानले जित हात पारेका छन् ।

शुक्रबार राति सम्पन्न खेलमा श्रीलंकाले आयरल्यान्डलाई ४१ रनले पराजित गर्दा अफगानिस्तानले भने स्कटल्यान्डलाई ५५ रनले पाखा लगायो ।

अमेरिकामा भएको खेलमा श्रीलंकाले दिएको १ सय ६४ रनको लक्ष्य पछ्याएको आयरल्यान्डले १८ ओभर २ बलमा सबै विकेट गुमाएर १ सय २२ रनमात्र जोड्न सक्यो ।

आयरल्यान्डका लागि कर्टिस क्याम्फरले २६ रन तथा कप्तान पल स्टिरलिङले २१ रन जोडे । श्रीलंकाका लागि दासुन शनकाले सर्वाधिक ४ विकेट हात पारे ।

यसअघि टस हारेर पहिले ब्याटिङ गरेको श्रीलंकाले निर्धारित २० ओभरमा ८ विकेट गुमाएर १ सय ६३ रन जोड्यो । श्रीलंकाका लागि एन्जेलो म्याथ्यूजले सर्वाधिक ३२ रन बनाए ।

आयरल्यान्डका लागि जोश लिटल र बेरी म्याककार्थीले २-२ विकेट हात पारे ।

वेस्ट इन्डिजमा भएको खेलमा अफगानिस्तानले दिएको १ सय ७९ रनको लक्ष्य पछ्याएको स्कटल्यान्डले निर्धारित २० ओभरमा ९ विकेट गुमाएर १ सय २३ रनमात्र बनाउन सक्यो ।

स्कटल्यान्डका लागि मार्क वाट्टले सर्वाधिक ३४ रन बनाए । अफगानिस्तानका लागि करिम जनत र मुजिब उर रहमानले समान २-२ विकेट हात पारे ।

यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ८ विकेट गुमाएर १ सय ७८ रन जोड्यो । अफगानिस्तानका लागि गुल्बादिन नइबले ६९ रन तथा अजमातुल्लाह ओमारजाईले ४८ रन बनाए ।

स्कटल्यान्डका लागि क्रिस सोलले ३ तथा बार्डली कुरीले २ विकेट हात पारे ।