उपसभामुखलाई राजीनामा दिन एमालेको सुझाव

फाइल फाेटाे

काठमाडौँ - नेकपा एमालेका नेता गोकुलप्रसाद बास्कोटाले आफूलाई सही प्रमाणित गर्नका लागि राजीनामा दिएर छानबिनका लागि मार्ग प्रशस्त गर्न उपसभामुखलाई सुझाव दिएका छन् । 

मंगलबार प्रतिनिधिसभाको विशेष समयमा बोल्दै बास्कोटाले विभिन्न व्यक्तिलाई अमेरिका पठाउने प्रसंगमा उपसभामुखमाथि विभिन्न प्रश्न उठेकाले आफूलाई सही प्रमाणित गर्नका लागि राजीनामा दिएर छानबिनका लागि मार्ग प्रशस्त गर्न सुझाव दिएका हुन् ।

लोकतन्त्रमा सबैमाथि प्रश्न उठाउन पाइने र प्रश्नको सामना गर्दै आफूलाई सही प्रमाणित गर्ने बाटो पनि लोकतन्त्रमा रहेको उनले बताए । ​

आफूमाथि प्रश्न उठ्दा राजीनामा दिएर अनुसन्धान गर्ने बाटो खुल्ला गरेको स्मरण गर्दै बास्कोटाले प्रश्न उठिसकेपछि सामना गर्ने साहस र आँट राजनीतिक व्यक्तिमा हुनुपर्ने जिकिर गरे । ​

उनले सांसदहरुमाथि नै प्रश्न उठ्दा के गर्ने भनेर कानुन बनाउनुपर्नेमा जोड दिए । उपसभामुखका बारेमा सरकारले कुनै निर्णय गर्यो की गरेन भन्ने कुरा सरकारको बिजनेस नभई संसदको बिजनेस भएको उनले बताए ।