राजनीतिक अस्थिरताको दोष निर्वाचन प्रणालीलाई दिने प्रवृत्ति गलत :प्रमुख निर्वाचन आयुक्त थपलिया

फाइल फाेटाे

काठमाडौँ - निर्वाचन आयोगका प्रमुख निर्वाचन आयुक्त दिनेश कुमार थपलियाले राजनीतिक अस्थिरताको दोष निर्वाचन प्रणालीलाई दिने प्रवृत्ति उचित नभएको बताएका छन् । 

संसदीय मामिला पत्रकार समाजले काभ्रेको धुलिखेलमा आयोजना गरेको निर्वाचन प्रणाली सुधार विषयक अन्तरक्रिया कार्यक्रममा थपलियाले दलहरूले दुई तिहाई बहुमत ल्याउँदा पनि ३ वर्ष सरकार नटिकेको भन्दै निर्वाचन प्रणालीका कारण राजनीतिक अस्थिरता भयो भन्ने प्रवृत्ति उचित नभएको बताएका हुन् । 

अहिलेको संविधान र कानूनले कुनै पनि राजनीतिक दललाई ५० प्रतिशत बहुमत ल्याउनबाट नरोकेको उनले बताए । सरकार अस्थिर भएका कारणले प्रणाली फेर्नुपर्छ भन्ने तर्क उचित नभएपनि निर्वाचन प्रणालीलाई प्रभावकारी बनाउन आवश्यकता अनुसार संशोधन गर्नुपर्नेमा उनले जोड दिए । 

उनले समावेशी–समानुपातिक प्रतिनिधित्वलाई कानुनले कमजोर बनाएको नभइ दलहरूले उम्मेदवार चयन गर्दा नै ध्यान दिन नसकेकाले गुनासो आउने गरेको धारणा राखे । त्यस्तै थपलियाले स्थानीय तहको निर्वाचनमा प्रमुख र उपप्रमुख तथा वडा अध्यक्ष र सदस्यको मतपत्र छुट्टाछुट्टै हुनुपर्नेमा जोड दिए ।