सरकारलाई शिक्षक महासंघको जवाफ-  शिक्षा विधेयक पारित नभएसम्म विद्यालय फर्किँदैनौँ

काठमाडौँ- नेपाल शिक्षक महासंघले विद्यालय शिक्षा विधेयक प्रतिनिधिसभाबाट पारित नभएसम्म आन्दोलन नरोकिने जनाएको छ ।

शिक्षा पत्रकार समूहले बुधबार काठमाडौँमा आयोजना गरेको अन्तक्रियामा महासंघका अध्यक्ष लक्ष्मीकिशोर सुवेदीले संसदबाट विद्यालय शिक्षा विधेयक पारित हुने अवस्था नभएसम्म आन्दोलन नरोकिने बताएका हुन् ।

उनले विधेयक प्रतिनिधिसभाबाट पारित भए राष्ट्रियसभाबाट पारित हुन र राष्ट्रपतिबाट प्रमाणीकरण हुन समय नलाग्ने जिकिर गरे । त्यसका लागि मिति तोकेर नै विधेयकको प्रक्रियालाई अघि बढाउनुपर्ने उनको भनाइ छ ।

अध्यक्ष सुवेदीले आन्दोलन निर्णायक नभएसम्म कुनै पनि शिक्षक विद्यालय नफर्कने स्पष्ट पारे । आन्दोलनलाई सफल बनाउन प्रत्येक शिक्षकबाट एक सय रुपैयाँ उठाउन सर्कुलर गरिएको र त्यहि उठेको रकमबाट आन्दोलन चलिरहेको उनले बताए ।

उनले विद्यालय शिक्षा विधेयक अघि बढाउन बिभिन्न राजनीतिक दलको ढोकामा गएपनि उनीहरुले वेवास्ता गरेका कारण अहिलेको अवस्था आएको उल्लेख गरे । आफुहरूको आन्दोलनका कारण पढाईमा पर्ने असरको क्षतिपूर्ति आफुहरू दिन तयार रहेको उनले बताए ।

अध्यक्ष सुवेदीले बाधा नपारिकन सुन्ने चरित्र राज्यको नभएकाले आफुहरूले कठोर आन्दोलन गर्नुपरेको जिकिर गरे ।  

सरकारले शिक्षकहरूको माग सम्बोधन गर्ने भन्दै बैशाख १२ गते संसद्‌ अधिवेशन आव्हान गरेको छ । 

मन्त्रिपरिषद्को मंगलबारको बैठकले शिक्षकले उठाएका माग सम्बोधन गर्न तयार रहेको र त्यसका लागि संवाद गर्न संवेदनशील रहेको उल्लेख गरेको छ ।

शिक्षा, विज्ञान तथा प्रविधिमन्त्री विद्या भट्टराईका अनुसार नेपाल शिक्षक महासंघ उठाएका मागको यथोचित सम्बोधन गर्ने सम्बन्धमा संवाद निरन्तर रहेको र अझै संवाद गर्न सरकार संवेदनशील तथा गम्भीर रहेको जानकारी दिएकी थिइन् । उनले शिक्षकले उठाएका यथोचित माग सम्बोधन गर्न सरकार तयार रहेको बताएकी थिइन् ।

महासङ्घको आह्वानमा भइरहेको प्रदर्शनप्रति सरकारको गम्भीर ध्यानाकर्षण भएको मन्त्री भट्टराईको भनाइ थियो । विद्यार्थी भर्नाको समय तथा एसइईको उत्तरपुस्तिका परीक्षण एवं कक्षा १२ को राष्ट्रिय परीक्षाको समय भएकाले विरोध र प्रदर्शनका कार्यक्रम स्थगन गरी अभिभावक एवं विद्यार्थीको हितलाई मध्यनजर गरी सम्पूर्ण शिक्षकलाई आ–आफ्नो कार्यथलोमा फर्किन मन्त्रिपरिषद्को बैठकले अनुरोध गरेको छ ।