कांग्रेसबाट निर्वाचित पालिका अध्यक्षले दिए विद्यालय नआउने शिक्षकलाई राजीनामा दिन वा सरूवा जान निर्देशन

काठमाडौँ- देशभरका शिक्षकहरू २५ दिनदेखि काठमाडौँमा आन्दोलनरत छन् । नेपाल शिक्षक महासंघको नेतृत्वमा विभिन्न माग राखेर आन्दोलन गरिरहेका शिक्षक र सरकारबीच वार्ता भएपनि निष्कर्षविहीन हुँदै आएको छ ।

विद्यालय सञ्चालनमा असर गरेको भन्दै गुल्मीको कालिगण्डकी गाउँपालिकाले आफ्नो पालिकाका शिक्षकहरूलाई बैशाख १४ गतेदेखि अनिवार्य विद्यालय उपस्थित हुन् निर्देशन दिएको छ ।

कालीगण्डकी गाउँपालिका अध्यक्ष बेदबहादुर थापाको हस्ताक्षरमा जारी सूचनामा विद्यालयमा उपस्थित भएर विद्यालय सञ्‍चालन नगर्ने शिक्षक कर्मचारीहरूलाई राजीनामा दिन वा सरुवा भएर अन्यत्र जान निर्देशन दिएका छन् ।

त्यस्तै गाउँपालिकाको निर्देशनको अवज्ञा गर्ने विद्यालयका शिक्षक तथा कर्मचारीलाई आवश्यक कारवाही प्रक्रिया अगाडि बढाइने सूचनामा लेखिएको छ ।

कालिगण्डकी गाउँपालिकाको अध्यक्षमा बेदबहादुर थापाको यो दोस्रो कार्यकाल हो । नेकपा एमालेका रामजी ढकाललाई हराउँदै नेपाली कांग्रेसबाट थापा निर्वाचित भएका थिए । कांग्रेसका थापाले ४८१० मत प्राप्त गरी विजयी विजयी भएका थिए भने एमालेका ढकालले ४६७७ मत प्राप्त गरेर पराजित भएका थिए ।