प्रहरी हाकिम होइन, जनताको सेवक हो: प्रधानमन्त्री ओली

जनकपुरधाम-  प्रधानमन्त्री केपी शर्मा ओलीले नेपाली जनताको शान्ति सुरक्षामा खटिएका नेपाल प्रहरीलाई शासक नभई जनताको सेवक भएर काम गर्न निर्देशन दिएका छन् । उनले आज जनकपुरधाममा मधेस प्रदेश प्रहरी कार्यालयको नवर्निमित भवनको उद्घाटनपश्चात आयोेजित समारोहलाई सम्बोधन गर्दै सो निर्देशन दिएका हुन् ।

मुलुकमा सुशासन तथा शान्ति सुरक्षा कायम गर्नका लागि नेपाल प्रहरी हाकिमको भूमिका होइन, जनताको सेवकको भूमिकामा काम गर्नुपर्ने प्रधानमन्त्रीको भनाइ थियो । कसैलाई जोरजबर्जस्तीबाट फसाउने काम नहोस् न्यायोचित हिसाबले प्रहरीबाट काम हुनुपर्ने उल्लेख गर्दै उनले राणा शासन तथा राजाको पञ्चायती व्यवस्थामा जस्तो कसैलाई फसाउने तथा यातना दिने काम नहोस् भने ।

प्रधानमन्त्री ओलीले भने, “त्यस समयमा शासनसत्ता जोगाउनका लागि झुटो आरोप लगाउने कार्य हुन्थ्यो । अहिले मुलुकमा केही तत्वहरूले अराजक फैलाउने कार्य गरिरहेको तथा आफूलाई नयाँ शक्तिको भ्रम फैलाउने तथा देशमा अराजक गतिविधिको काम गरेकाले त्यसबाट सतर्क एवं सजग हुनुपर्छ ।”

समाजमा अराजक फैलाउने तत्वहरूको मुलुकमा लोकतन्त्र ल्याउनका लागि कुनै योगदान नरहेको समेत विचार व्यक्त गर्दै प्रधानमन्त्री ओलीले झुटो बोल्ने तत्वहरूलाई समाज तथा राष्ट्रले सजाय दिनुपर्नेमा जोड दिए । उनले जनताको ठूलो त्याग, तपस्या तथा बलिदानीबाट मुलुकमा लोकतन्त्र आएकाले लोकतन्त्रको सुरक्षा तथा दिगो बनाउन सम्पूर्ण लोकतान्त्रिक शक्तिहरू लाग्नुपर्ने बताए ।

प्रधानमन्त्री ओलीले भने,‘नेपाली सेनाले राष्ट्रको सुरक्षा गर्ने काम गरिरहेको छ, त्यस्तै नेपाल प्रहरीले आफ्नो योग्यता तथा दक्षताको माध्यमबाट जनतालाई इमान्दारीपूर्वक जनताको सुरक्षा तथा सेवा गर्नुपर्छ ।’

देशमा बढ्दो आपराधिक क्रियाकलाप, चोरी र डकैती, लागुऔषधको प्रयोग तथा सीमा क्षेत्रमा हुने विभिन्न चोरी, तस्करी, अवैध रूपमा हुने मानव ओसारपसार रोक्न तथा राजस्व चुहावट नियन्त्रण गर्न चुनौती भएकाले त्यसलाई रोक्नका लागि प्रहरी सङ्गठन इमान्दारीकासाथ गम्भीरतापूर्वक लाग्नुपर्नेमा उनको जोड थियो ।

प्रधानमन्त्री ओलीले नेपाली कांग्रेस तथा नेपाल कम्युनिष्ट पार्टी ९एमाले०को संयुक्त प्रयासबाट निर्माण भएको वर्तमान सरकारले देशमा स्थिरता तथा शान्ति सुरक्षा एवं सुशासन दिने उल्लेख गर्दै भष्टाचार नियन्त्रण गर्ने र जनतालाई छिटोछरितो रूपमा सेवा दिनेतर्फ प्रहरीले जोड हुनुपर्नेबताए। उनले नेपाल प्रहरीलाई समयसापेक्ष भौतिक सुविधाले सम्पन्न गराउनेतर्फ मधेस प्रदेश सरकारले यो भवन निर्माण गरेकामा खुसी व्यक्त गरे ।

सोही अवसरमा मधेस प्रदेशका मुख्यमन्त्री सतिशकुमार सिंहले प्रहरी समायोज नहुँदा प्रदेशको शान्ति, सुरक्षालगायतका कार्य गर्न समस्या भएको गुनासो गरे । मधेस प्रदेश सरकार स्थापना भएको विगत सात वर्षपछि धेरै राजस्व सङ्कलन गरेर पछिल्लो सरकार प्रदेशको विकासमा लागेको उल्लेख गर्दै उनले चुरेको समस्या समाधानका लागि ठोस योजना ल्याउन प्रधानमन्त्रीसँग माग गरे ।

नेपाल प्रहरीका प्रमुख एवं प्रहरी महानिरीक्षक दीपक थापाले मुलुकमा शान्ति, सुरक्षा कायम गर्न तथा जनताको जिउधनको सुरक्षा गर्न नेपाल प्रहरी उच्च मनोबलका साथ कार्य गरिरहेको बताए ।

त्यस्तै सोही अवसरमा मधेस प्रदेश प्रहरी प्रमुख एवं प्रहरी महानायव महानिरीक्षक उमाप्रसाद चतुर्वेदीले मधेस प्रदेशको शान्ति सरक्षाको अवस्थाबारे जानकारी दिँदै प्रदेशमा प्रहरी जनशक्ति कम रहेको बताए । उनले १० हजार प्रहरी दरबन्दी रहेको मधेस प्रदेशमा करिब नौ हजार प्रहरी कर्मचारी रहेको जानकारी दिए ।

मधेस प्रदेशमा ६२ लाख कुल जनसङ्ख्या रहेको तर त्यसका लागि करिब ३७ हजार ४०० प्रहरीको आवश्यकता रहेको उनको भनाइ थयो । सो अवसरमा प्रधानमन्त्री ओलीले उद्घाटन गरेको प्रदेश प्रहरी भवनको निरीक्षणसमेत गरेका थिए ।