काभ्रेका थप दुई अस्पतालले पाए स्वास्थ्य बिमा स्वीकृति

काभ्रेपलाञ्चोक- स्वास्थ्य बिमा कार्यक्रमअन्तर्गत काभ्रेपलाञ्चोकका थप दुई अस्पतालले प्रथम सेवा केन्द्रको स्वीकृति पाएका छन् । बनेपा नगरपालिकाद्वारा सञ्चालित बनेपा आधारभूत अस्पताल र मण्डनदेउपुर नगरले सञ्चालनमा ल्याएको आधारभूत अस्पताल स्वास्थ्य बिमा बोर्डमा आबद्ध भएका हुन् । 

दुई नगरका जनप्रतिनिधिलगायतको टोलीले बोर्डसँग आइतबार सम्झौता गरेका थिए । मण्डनदेउपुरका प्रमुख टोकबहादुर वाईबाले स्वास्थ्य बिमालाई प्रभावकारी ढंगले सञ्चालन गर्न नगरपालिका तयार रहेको बताए ।    

यो सम्झौतासँगै काभ्रेपलाञ्चोकमा स्वास्थ्य बिमाको प्रथम सेवाविन्दु सञ्चालनका लागि अनुमति पाउने सरकारी स्वास्थ्य संस्थाको सङ्ख्या सात पुगेको छ । यसअघि सुनथान, खोपासी, पाँचखाल र धुलिखेल प्राथमिक स्वास्थ्य केन्द्र तथा मेथिनकोट प्रादेशिक अस्पतालले स्वीकृति पाइसकेका छन् ।