दाहाल-नेपाल समूहले थप आन्दोलनका कार्यक्रम सार्वजनिक गर्दै

काठमाडौँ : प्रतिनिधि सभा विघटनविरुद्ध नेकपाको दाहाल-नेपाल समूहले थप आन्दोलनका कार्यक्रम सार्वजनिक गर्दैछ । सोमबार बिहान ११ बजे पार्टी कार्यालय पेरिसडाँडामा पत्रकार सम्मेलन गरेर दाहाल-नेपाल समूहले थप आन्दोलनका कार्यक्रम सार्वजनिक गर्न लागेको हो ।

निर्वाचन आयोगले समेत बहुमत हुँदाहुँदै पनि आधिकारिक नेकपाको मान्यता नदिएपछि आक्रोशित बनेको दाहाल-नेपाल समूह सडक आन्दोलन थप चर्काउने निष्कर्षमा पुगेको छ । यसअघि आइतबार बसेको दाहाल-नेपाल समूहको स्थायी कमिटीको बैठकले प्रधानमन्त्री केपी शर्मा ओलीलाई साधारण सदस्य समेत नरहने गरी निष्काशन गर्ने निर्णय गरेको थियो ।

पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेपछि दाहाल नेपाल समूह विभाजन भएर सडक संघर्षमा आएको हो । यसक्रममा माइतीघरमा धर्ना बस्नेदेखि काठमाडौँमै शक्ति प्रदर्शनसम्मका कार्यक्रम दाहाल-नेपाल समूहले गरेका छन् । 

प्रतिनिधि सभा विघटनविरुद्ध सर्वोच्च अदालतमा परेका दर्जन बढी रिटमाथि सुनुवाइ पनि चलिरहेको छ ।