‘संसद् पुनर्स्थापना भइहाले प्रचण्डजी र माधवजी हलबाँधेर प्रधानमन्त्री खोज्‍न म कहाँ आउन बेर छैन’

काठमाडौँ  :  प्रधानमन्त्री केपी शर्मा ओलीले सर्वाेच्च अदालतले प्रतिनिधि सभा पुनर्स्थापनाको पक्षमा फैसला सुनाए नेकपा दाहाल नेपाल समूहका अध्यक्षद्वय पुष्पकमल दाहाल र माधवकुमार नेपाल प्रधानमन्त्री खोज्दै आफैँ कहाँ आइपुग्ने टिप्पणी गरे । मंगलबार आफू निकट युवा संघ नेपालको केन्द्रीय कमिटीको प्रथम पूर्ण बैठकलाई सम्बोधन गर्दै ओलीले प्रतिनिधि सभा पुनर्स्थापना भइहाले प्रधानमन्त्री खोज्दै दाहाल नेपाल आफू कहाँ आइपुग्ने बताएका हुन् ।  

‘संसद् पुनर्स्थापना भयो भने के हुन्छ भन्दा प्रचण्डजी र माधवजी हल बाँधेर  प्रधानमन्त्री खोज्न निस्कनुहुन्छ । कहिले उत्तरतिर कहिले यस्सो दक्षिणतिर लाग्नु हुन्छ । प्रधानमन्त्री भइदिनुस् न यत्ति त मानिदिनुस् न भन्नुहुन्छ,’ उनले भने, ‘उहाँहरुको कुनै सम्भावना छ प्रधानमन्त्री हुने ? एकभन्दा तल प्रतिशत पनि छैन उहाँहरुको सम्भाना । लडाइँ जितिहाल्नु भयो भने उहाँहरु प्रधानमन्त्री खोज्दै हिँडेर अन्तिममा मकहाँ आइपुग्न बेर लाउनुहुन्न ।’  

ओलीले आधिकारिक नेकपा आफूले नेतृत्व गरेको पार्टी र उक्त पार्टीको चुनाव चिन्ह यही पार्टीले नै पाउने दाबी गरे । ओलीले २०४८ सालमा आफूले नै निर्वाचन आयोगमा चिन्ह दर्ता गराएको र आफू सधैँ सूर्य चिन्हबाटै चुनाव लडिरहेको बताए । उनले दाहालले अहिलेसम्म सूर्य चिन्हमा चुनाव नलडेको पनि बताए ।