धनगढी – सुदूरपश्चिम प्रदेशमा काेभिड संक्रमण दर घट्न थालेको छ । पछिल्लो एक सातायता सुदूरपश्चिममा काेभिड संक्रमण दर घटेको स्वास्थ्य निर्देशनालयको तथ्यांकले देखाएको छ । तथ्यांकमा संक्रमण दर घटेको देखिए पनि स्वास्थ्यकर्मी भने पछिल्लो समय काेभिडको जोखिम झनै उच्च रहेको बताउँछन् ।

‘अहिले घरघरमै कोरोन जस्तै लक्षण भएका बिरामी देखिन्छन्,’ सुदूपश्चिम प्रदेशका स्वास्थ्य निर्देशक डा‍. जगदिश जोशीले भने, ‘अस्पतालमा परीक्षण गराउन आउनेको संख्या न्यून छ, जसका कारण संक्रमण दर केही घटेको देखिए पनि जोखिम उच्च छ ।सबैले सावधानी अपनाउनु पर्दछ ।’ 

भारतबाट आउने नागरिकको सीमामा स्वास्थ्य परीक्षण गर्दा संक्रमण दर उस्तै रहेको भए पनि समुदाय स्तरबाट काेभिड परीक्षण गराउने दर घटेका कारण काेभिड संक्रमण दर घटेको जस्तो देखिएको निर्देशक जोशीले बताए । तर, कोराना परीक्षण गराउन अस्पताल आउनेमध्ये ६० प्रतिशत बढीमा संक्रमण पुष्टि हुने गरेको उनले बताए ।

‘अस्पतालसम्म पुग्नेमध्ये ६० प्रतिशत बढीमा काेभिड संक्रमण पुष्टि हुने गरेको छ,’ निर्देशक जोशीले भने, ‘यसले यसले पनि काेभिडको जोखिम उच्च छ भन्ने देखाउँछ, तथ्या‌ंकमा संक्रमण घटेको देखेर खुसी हुनुपर्ने अवस्था छैन ।’

उनले भारतमा काेभिडको जोखिम अझै पनि उच्च भएका कारण सुदूरपश्चिममा काेभिडको जोखिम कम छ भन्ने नमिल्ने बताए । ‘भारतमा संक्रमण दर धेरै छ,’ प्रदेश स्वास्थ्य निर्देशक जोशीले भने, ‘त्यसको प्रत्यक्ष असर सुदूरपश्चिममा हुने गर्दछ, त्यसैले हामी देशका अन्य प्रदेशभन्दा बढी जोखिममा छौं ।’

पछिल्लो समय घरघरमै काेभिडकै जस्तो लक्षण देखिएका बिरामी रहे पनि परीक्षण गराउन अस्पतालसम्म नआउने गरेको भन्दै त्यसले जोखिम अझै बढाउन सक्ने निर्देशक जोशी बताउँछन् । काेभिडको जस्तो लक्षण देखिएमा सबैलाई स्वास्थ्य संस्थामा गएर अनिवार्य स्वास्थ्य परीक्षण गराउनसमेत उनले आग्रह गरेका छन् । 

स्वास्थ्य निर्देशनालय डोटीले पछिल्लो एक साताको अवधिमा सार्वजनिक गरेको काेभिड संक्रमण दरको तथ्यांकअनुसार  ११ माघमा सुदूरपश्चिममा सबैभन्दा बढी ६५२ जनामा संक्रमण देखिएको थियो । त्यसपछि भने संक्रमण दर निरन्तर घट्दो क्रममा छ । ११ माघमा एक हजार ९७३ जनाको स्वास्थ्य परीक्षण गर्दा ६५२ जनामा संक्रमण देखिएको थियो । १२ माघमा एक हजार ८ ५० जनाको स्वाव परीक्षण गर्दा ६१४ जनामा काेभिड संक्रमण पुष्टि भएको थियो ।  

स्वास्थ्य निर्देशनालयका अनुसार १३ माघमा एक हजार ९१३ जनाको स्वास्थ्य परीक्षण गर्दा ५५८ जना र १४ माघमा ४८६ जनामा काेभिड संक्रमण पुष्टि हुँदा १५ माघमा २६९ जनामा काेभिड संक्रमण पुष्टि भएका निर्देशनालयको तथ्याङ्कमा उल्लेख छ ।

यसैगरी १६ माघमा ३३६ जनामा काेभिड संक्रमण पुष्टि हुँदा सोमबार भने पुनः संक्रमण दर बढेर ४१३ जनामा संक्रमण पुष्टि भएको छ । सोमबार प्रदेशका एक हजार ४४८ जनाको स्वास्थ्य परीक्षण गर्दा ४१३ जनामा संक्रमण पुष्टि भएको निर्देशनालयले जनाएको छ । 

सुदूरपश्चिममा एक साताको अवधिमा तीन जनाको काेभिड संक्रमणका कारण मुत्यु भएको छ । स्वास्थ्य निर्देशनालयका अनुसार १३ माघमा कैलालीका एक जनाको र १४ माघमा कैलाली तथा कञ्चनपुरका एक एक जनाको काेभिड संक्रमणका कारण मृत्यु भएको हो । 

योसँगै सुदूरपश्चिममा काेभिड संक्रमणका कारण मृत्यु हुनेको संखया ६२३ रहेको छ । सोमबारसम्म सुदूरपश्चिममा ५७ हजार ८१५ जनामा काेभिड संक्रमण पुष्टि भएकोमा ५३ हजार ६९ जना काेभिड संक्रमण मुक्त भएका छन् । 

सोमबारसम्म सुदूरपश्चिममा चार हजार ६९८ जनामा काेभिडको सक्रिय संक्रमण रहेको स्वास्थ्य निर्देशनालयले जनाएको छ । निर्देशनालयका अनुसार सोमबारसम्म कैलालीका सबैभन्दा बढी दुई हजार ५०२ जनामा काेभिडको सक्रिय संक्रमित छन् । यसैगरी कञ्चनपुरका एक हजार ८२ जनामा सक्रिय संक्रमित छन् ।

निर्देशनालयका अनुसार डोटीमा २७९,  दार्चुलामा ८६, डडेल्धुराका २४८, बाजुरामा २३१, बझाङमा १४१, बैतडीमा २०२ र अछाममा १३१ जना सक्रिय संक्रमित छन् ।