एसीसी प्रिमियर कप : हङकङलाई हराउँदै नेपाल सेमिफाइनलमा
काठमाडौँ- नेपालले ओमानमा जारी एसीसी प्रिमियर कप क्रिकेट प्रतियोगिताको सेमिफाइनलमा स्थान सुरक्षित गरेको छ ।
समूह 'ए' अन्तर्गत सोमबार हङकङलाई ८ विकेटले पराजित गर्दै नेपाल एक खेलअगावै अन्तिम चारमा पुगेको हो । नेपालले यसअघिका दुवै खेल जितेको थियो ।
सोमबारको खेलमा १ सय १५ रनको लक्ष्य नेपालले १२ ओभर २ बलमा २ विकेट गुमाएर पूरा गर्यो ।
नेपालका लागि आशिफ शेखले ४० रन तथा कुशल भुर्तेलले ३२ रन जोडे । कप्तान रोहित पौडेलले २५ रन तथा सन्दीप जोराले १९ रन बनाए ।
हङकङका लागि एहसान खान र यासिम मुर्ताजाले १-१ विकेट हात पारे ।
यसअघि टस हारेर पहिले ब्याटिङ गरेको हङकङले तय गरिएको १७ ओभर ५ बलमा सबै विकेट गुमाएर १ सय १४ रन बनायो ।
हङकङका लागि अन्सुमन रथले ३४ रन तथा कप्तान निजाकत खानले १२ रन बनाए । जिसन अलीले १४ रन जोडे ।
नेपालका लागि अविनाश बोहराले ३, ललित राजवंशी र दिपेन्द्र सिंह ऐरीले २-२ तथा करण केसीले १ विकेट हात पारे ।
