मकवानपुर- मकवानपुर क्षेत्र नम्बर–२ मा एमालेका उम्मेदवार महेशकुमार बर्तौलाले युवालाई स्थानीय स्तरमै स्वरोजगारकाे अवसर दिलाउने बताएका छन् । युवाहरू सामान्य रोजगारीका लागि पनि खाडी मुलुक जाने गरिरहेकाेमा अब स्थानीय स्तरमै स्वरोजगार बनाउने उनले बताए ।

मंगलबार मकवानपुरको पश्चिमी क्षेत्रमा चुनावी सभालाई सम्बोधन गर्दै बर्ताैलाले स्थानीय स्तरमा युवा लक्षित विभिन्न स्वरोजगार मुलक कार्यक्रम ल्याएर रोजगारीको सृजना गरिने बताए । मकवानपुरकाे मनहरी, हाडीखोला, राक्सिराङ गाउँपालिकामा भएकाे चुनावी प्रचारप्रसारका क्रममा उनले स्थानीय स्तरमा रहेका शिक्षा, स्वास्थ्य, खानेपानी, बिजुलीलगायतका आधारभूत आवश्यकताका समस्या सधैँका लागि समाधान गर्ने आश्वासन समेत दिएका छन् ।

यसैगरी मनहरी गाउँपालिका क्षेत्रमा निकुञ्ज तथा नदीकाे समस्या कानुन संशोधन गरेर सधैँका लागि हल गर्ने बताए । यस क्षेत्रमा सडक पूर्वाधारको समस्याका कारण सदरमुकाम आउन र जानका लागि समस्या हुन नदिने उनले दाबी गरे ।