बुटवल – प्रमुख प्रतिपक्षी नेकपा एमालेले बुटवलमा सडक विस्तारको काम तत्काल अघि बढाउन माग गरेको छ । एमाले बुटवल उपमहानगर कमिटीले बेलहिया–बुटवल व्यापारिक मार्ग विस्तार आयोजना प्रमुख जयलाल मरासिनीलाई बिहीबार ज्ञापनपत्र बुझाउँदै सडक विस्तार अघि बढाउन माग गरेको हो । कमिटीले सडक विस्तार रोकिनुको कारण स्पष्ट पार्न पनि आयोजना प्रमुखसमक्ष माग गरेको छ । 

सडक विस्तार रोकिँदा चौराहादेखि गोलपार्कसम्मको सडकखण्ड धुँलो र खाल्डाखुल्डीले हिँड्नै नसकिने भएको छ । कमिटीका अध्यक्ष किसन ज्ञवालीले सडकका खाल्डाखुल्डी पुर्न, सडक रिसोलिङ गर्ने र नियमित राजमार्ग सरसफाइ गर्न माग गरे । साथै सडकमा धँुलो उड्न नदिन समय तालिका बनाएर पानी हाल्न उनले माग गरे । सो क्रममा एमाले नेताहरू गोपाल राना, बाबुराम पन्थीलगायतले सडक खण्डबीचको भाग तत्काल निर्माण गरी सवारी आवागमन सहज बनाउन आयोजना प्रमुखसमक्ष आग्रह गरे ।

ज्ञापनपत्र बुझ्दै आयोजना प्रमुख मरासिनीले सडक निर्माण लम्बिन पुगेको स्वीकार गर्दै अब भने काम नरोकिने आश्वासन दिए । ‘अब धेरै खाल्डाखुल्डी भएका ठाउँमा मर्मत गर्छौं र त्यसपछि भेरिएसन अर्डर स्वीकृत हुनसाथै सडक विस्तारको बाँकी काम अगाडि बढ्छ,’ उनले भने, ‘अझै पनि १०–१२ वटा घरको केही भाग भत्काउनपर्ने अवस्था रहेकाले निर्माणमा ढिलाइ भइरहेको छ ।’ 

यो सडक खण्ड निर्माणको ठेक्का चार वर्षअघि नै द कञ्चनजंघा बिरुवा जेभी कन्स्ट्रक्सन प्रालि काठमाडौंले पाएको थियो । कम्पनीका सञ्चालक सुमित श्रेष्ठले भेरिएसन अर्डर स्वीकृत नभएकाले काम रोकिएको बताए । भेरिएसन अर्डर स्वीकृत भएपछि काम अगाडि बढ्ने उनको भनाइ छ । यसका साथै कोभिड महामारीका कारण सडक विस्तारमा ढिलाइ भएको उनले बताए ।

‘म आफैं पनि कोभिडबाट संक्रमित भएँ । कोभिडको समयमा जिल्ला प्रशासन कार्यालयले निषेधाज्ञा जारी गरेपछि निर्माणकार्य अघि बढ्न सकेन, अब भेरिएसन अर्डर स्वीकृत भएपछि काम अगाडि बढ्छ,’ उनले भने । बुटवलको चौराहादेखि गोलपार्कसम्मको सडक ६ लेन बनाउने क्रममा केही घरधनीले अदालतमा मुद्दा हालेपछि सडक विस्तार लामो समय रोकिएको थियो । पछिल्लो पटक पुसमा सडक विस्तार आयोजनाले घर भत्काउनेबारे घरधनीलाई २४ घण्टे सूचना जारी गरेको थियो ।

बुटवलको सडक क्षेत्रभित्र परेका घरमा डिभिजन सडक कार्यालयले डोजर लगाएर भत्काएको करिब एक वर्ष भए पनि पूर्ण रूपमा सडक विस्तार हुन सकेको छैन । घर भत्काएको ६ महिनासम्म पनि सडक निर्माणअगाडि बढाउनुको साटो ठेकेदार कम्पनी बेपत्ता भएपछि सडकको अवस्था लथालिंग भएको हो । त्यसयताको ६ महिना वर्षालगायत विभिन्न बहानामा काम अगाडि बढ्न सकेको छैन ।