सुदूरपश्चिम सरकार छाड्न नाउपाकी अध्यक्ष रञ्जिताको लिखित निर्देशन
काठमाडौँ- नागरिक उन्मुक्ति पार्टी (नाउपा) ले कमलबहादुर शाह नेतृत्वको सरकारलाई दिएको समर्थन फिर्ता लिन संसदीय दललाई निर्देशन दिएको छ ।
पार्टी अध्यक्ष रञ्जिता श्रेष्ठ चौधरीले आज नागरिक उन्मुक्ति पार्टी सुदूरपश्चिम प्रदेश सभामा, संसदीय दलका नेता घनश्याम चौधरीलाई पत्र पठाउँदै, नेपाली कांग्रेस नेतृत्वको प्रदेश सरकारलाई दिएको समर्थन फिर्ता लिन निर्देशन दिएकी हुन् ।
‘नागरिक उन्मुक्ति पार्टीको केन्द्रीय कमिटीको चैत १४ गते टीकापुरमा बसेको बैठकको निर्णय अनुसार पार्टीले दिएको समर्थन फिर्ता लिने निर्णय भएकाले सोही बमोजिम सरकारबाट बाहिर आउन निर्देशन गर्दछु,’ अध्यक्ष रञ्जिताले शुक्रबार पठाएको पत्रमा उल्लेख छ ।
पत्रमा सरकारबाट बाहिर नआए पार्टी विधान बमोजिम कारबाहीको चेतावनी पनि दिइएको छ । ‘सरकार बाहिर नआए पार्टीको विधान आकर्षित गरिनेछ,’ पत्रमा भनिएको छ । उन्मुक्तिको चैत १४ गतेको टीकापुरमा भएको निर्णयलाई काउन्टर दिँदै उन्मुक्तिका दुई जना बिनाविभागीय मन्त्रीहरूले बिहीबार मात्रै मन्त्रालयको जिम्मेवारी सम्हालेका थिए ।
२१ जनाको केन्द्रीय कमिटीका १२ जना पदाधिकारीहरूको संघमा पनि नयाँ गठबन्धन र प्रदेशहरूमा पनि सोही गठबन्धनलाई समर्थन गर्ने निर्णय गरेको थियो । तर, मन्त्री भइसकेको उन्मुक्तिका प्रदेश सभा सदस्यहरू भने पार्टीको निर्देशनको पटक-पटक अवज्ञा गर्दै आएका छन् ।
