काठमाडौँ – साताभरको कारोबारमा सेयर बजार परिसूचक ३६ अंकले घटेको छ । साताको अन्तिम कारोबारपश्चात सेयर बजार परिसूचक १९९३ अंकमा ओर्लिएको छ। गत साता १६७ अंक बढेर २०२८.७७ अंकमा उक्लिएको बजार यो साता ३६.१५ अंक घटेर १९९२.६२ अंकमा ओर्लिएको हो ।

साताभरमा नेप्से परिसूचक १.७८ प्रतिशतले घटेको छ। यससँगै, सेयर बजार पूँजीकरण २८ खर्ब ४१ अर्ब ९८ करोड रुपैयाँ कायम भएको छ । यस साता ६ कारोबारमध्ये ४ दिनको कारोबारमा बजार घटेको थियो भने दुई कारोबार दिनमा बढेको थियो। साताको अन्तिम कारोबारको दिन बजार परिसूचक ३४.७० अंकले घटेको थियो ।

नेप्से परिसूचक घटे पनि यो साता कारोबार रकम भने बढेको छ । गत साता ११ खर्ब ६४ अर्ब रुपैयाँको कारोबार भएको थियो ।

यद्यपी, यो साता नेप्सेको बजार पूँजीकरण भने घटेको छ । नेप्से परिसूचक घटेको साता कारोबार रकम बढेपनि बजार पूँजीकरण भने घटेको हो । गत साताको तुलनामा ५० अर्ब ५३ करोड रुपैयाँले बजार पूँजीकरण घट्दै २८ खर्ब ४१ अर्ब ९८ करोड रुपैयाँमा आइपुगेको छ । गतसाता सेयर पुँजीकरण २८ खर्ब ९२ अर्ब ५१ रहेको थियो।