तेहरान- महसा अमिनीको मृत्युपछि सन् २०२२ मा भएको विरोध प्रदर्शनमा रिभोल्युसनरी गार्डहरूले यौन दुर्व्यवहार गरी एक किशोरीको हत्या गरेको भन्ने बिबिसीको रिपोर्टलाई इरानको न्यायपालिकाले बिहीबार खारेज गरेको छ । 

महिलाहरूका लागि इरानको कडा ड्रेस कोडको उल्लङ्घन गरेको आरोपमा तेहरानमा नैतिकता प्रहरीद्वारा पक्राउ परेपछि सन् २०२२ सेप्टेम्बरमा भएको २२ वर्षीया इरानी कुर्द अमिनीको मृत्युलाई लिएर सम्पूर्ण इरानमा विरोध प्रदर्शन सुरु भएको छ । 

सेप्टेम्बर २० मा राजधानी तेहरानमा ती प्रदर्शनहरूमा सहभागी भएपछि बेपत्ता भएको १६ वर्षीया निका शाकरमीको शव एक सातापछि फेला परेको थियो । सो समयमा इरानमा अधिकारीहरूले मृत्युलाई विरोध प्रदर्शनसँग जोडिएको अस्वीकार गर्दै ती किशोरीले एउटा भवनबाट हामफालेर आत्महत्या गरेको बताएका थिए । 

यद्यपि यसै साता बिबिसीको एक रिपोर्टमा इस्लामिक रिभोल्युसनरी गार्ड कर्प्सका सदस्यहरूले पक्राउ गरेपछि यौन दुर्व्यवहार गरी ती किशोरीको हत्या गरेको आरोप लगाइएको छ । 

न्यायपालिकाको मिजान अनलाइन वेबसाइटमा पोस्ट गरिएको विज्ञप्तिमा भनिएको छ, 'निका शाकरमीको बारेमा बिबिसी वर्ल्डको कथित खोजी  रिपोर्टले उक्त मिडिया आउटलेट सत्य र वास्तविकिताप्रति प्रतिबद्ध नभएको देखाएको छ ।'

ब्रिटिस ब्रोडकास्टरले ‘स्रोत र कागजातहरू प्रमाणीकरण गर्ने सम्भावना भएको दस्तावेज गरिएको रिपोर्टको सबैभन्दा आधारभूत सिद्धान्तमा ध्यान नदिएको’ रिपोर्टले देखाएको विज्ञप्तिमा उल्लेख छ । 

तेहरानको कानुनी चिकित्सा सङ्गठनका धेरै फोटो र दस्तावेज समावेश भएको बयानले दुर्व्यवहारलाई अस्वीकार गरेको छ र किशोरीले आत्महत्या गरेको बताएको छ । 

अमिनीको मृत्युपछि महिनौँसम्म जारी अशान्तिले दर्जनौँ सुरक्षाकर्मीसहित सयौँ मानिस मारिए र हजारौँलाई गिरफ्तार गरियो । इरानी अधिकारीहरूले विरोध प्रदर्शनलाई ‘दङ्गा’ भन्दै तेहरानका विदेशी दुश्मनमाथि अशान्ति फैलाएको आरोप लगाएका छन् । सुरक्षा बलविरुद्ध हत्या र अन्य हिंसासम्बन्धी विरोध–सम्बन्धी मुद्दामा नौ जनालाई मृत्युदण्ड दिइएको छ । रासस/एएफपी