युक्रेनमाथि रुसी हमला : भारतकाे माैन समर्थन !
काठमाडौँ - युक्रेनमा ६ दिनदेखि रुसले आक्रमण जारी राखेको छ । सोमबार भएको वार्ताले कुनै सकारात्मक परिणाम नदिएपछि रुसले फेरि आक्रमणलाई तीव्रता दिएको छ । आक्रमणका दर्दनाक तस्बिर/भिडियोहरू सार्वजनिक भइरहेका छन् ।
युक्रेनमा जारी रुसी आक्रमणको विश्वव्यापीरूपमा विरोध भइरहेको छ । नेपाललगायत विभिन्न देशले युक्रेनमाथि रुसी आक्रमणको निन्दा गरे । युक्रेनमा जारी रुसी आक्रमणबारे भारत अझै पनि मौन छ ।
युक्रेनसम्बन्धी संयुक्त राष्ट्र सुरक्षा परिषद्को निन्दा प्रस्तावमा भारत तटस्थ बसेको थियो । युक्रेनमा रुसको आक्रमणको निन्दा गर्दै संयुक्त राष्ट्र सुरक्षा परिषद्मा ११ सदस्यले प्रस्तावको पक्षमा मतदान गरेका थिए । यो प्रस्तावमा चीन र युएई पनि तटस्थ बसेका थिए ।
दुई पटक उक्त प्रस्ताव गर्दा पनि भारतले मतदान गरेन । प्रस्तावमा रुसले भिटो पावर प्रयोग गरेपछि अब उक्त प्रस्ताव संयुक्त राष्ट्रको महासभामा लगिएको छ । महासभामा बहुमतले प्रस्ताव पारित हुन्छ । यसमा पनि भारतले के गर्छ भन्ने चासो छ ।
रुसले भारतलाई हतियार र रक्षा उपकरण सहयोग गर्दै आएको छ । यतिमात्रै होइन रुसी राष्ट्रपति भ्लादिमिर पुटिन र भारतीय प्रधानमन्त्री मोदीको सम्बन्ध पनि राम्रो छ ।
त्यतिमात्रै होइन संयुक्त राष्ट्रसंघको मानवअधिकार परिषद्मा भएको मतदानमा पनि भारत पुनः तटस्थ बसेको छ । जबकि नेपालले पक्ष र चीनले मानवअधिकारको विपक्षमा मतदान गरेकाे थिए ।
युक्रेनका राष्ट्रपति भोलोदिमिर जेलेन्स्कीले भारतीय प्रधानमन्त्री मोदीलाई टेलिफोन गरी सहयोग गर्न आग्रह गरेका थिए । तर भारतले यसबारे कुनै प्रतिक्रिया दिएन । अर्थात सहयोग गर्न आवश्यक ठानेन । यसले युक्रनेमा जारी रुसी आक्रमणमाथि भारतको मौन समर्थनजसत्तो देखिन्छ ।
भारतीय प्रधानमन्त्री नरेन्द्र मोदी आफूलाई कट्टर हिन्दुवादी भन्छन् । हिन्दूवादी नेताले युद्धको विरोध गर्दै शान्तिका पक्षमा बोल्ने अपेक्षा भए पनि रुसी आक्रमणबारे उनले मौनता साँधेका छन् ।
