काठमाडौँ- रिडी-तम्घास सडक खण्ड १७ दिन बन्द हुने भएकाे छ । जिल्ला प्रशासन कार्यालय तम्घास, गुल्मीले उक्त सडक खण्ड अन्तर्गत पानीट्यांकी ठूलोढुङ्गामा यहीं वैशाख १५ देखि ३१ गतेसम्म सवारी साधन आवागमनमा रोक लगाउने भएकाे हाे ।

प्रमुख जिल्ला अधिकारी सागरमणि पाठकका अनुसार निर्माण कार्य सुचारु गर्न पहरो फोरी सडक चौडा गर्नका लागि मुख्य सडक खण्डमा सवारी साधन आवतजावतले कठिनाइ भएको हुँदा र सवारी साधन नरोकी निर्माण कार्य गर्दा दुर्घटनाको जोखिम भएकाले बाटो बन्द गरिएको हाे ।

उक्त स्थानमा बिहान १० देखि दिउँसो १ बजेसम्म, दिउँसो ३ देखि साँझ ६ बजेसम्म र राति १० देखि बिहान ३ बजेसम्म सवारी साधन आवतजावतमा रोक लगाइएको छ ।

गत फागुन २६ गते निर्माण व्यवसायी श्री समानान्तर–एलिट जे.भी. र नेपाल सरकार, मदन भण्डारी राजमार्ग आयोजना निर्देशनालय, चाकुपाट, ललितपुरबीच सडक निर्माण कार्यको सम्झौता भई निर्माण कार्य सुचारु भएको थियो ।